Estudante Timoroan na’in 58 hala’o asaun protesta iha Fronteira Batugade tanba portaun taka, domingu (05/04/2020). Imajen/Eugénio Pereira

BATUGADE, 05 abríl 2020 (TATOLI)- Konsuladu Timor-Leste ba Kupang, Jesuíno dos Reis Matos “Zito” ho Konsuladu TL iha Atambua, João Simão Sousa, koordena ho Servisu Migrasaun no Autoridade Polísia Indonézia, ohin, fasilita lori tama-tan estudante Timoroan na’in 58  liuhosi fronteira terrestre Motain, Indonézia no Batugade, Postu Administrativu Balibo, Munisípiu Bobonaro.

Notísia Relevante : Tama Ilegál, Estudante Timoroan 16 Entrega-An ba UPF

Konsuladu Timor-Leste ba Kupang, Jesuíno dos Reis Matos “Zito” halo komunikasaun ho Komandante UPF, João Belo dos Reis, atu loke portaun fasilita estudante Timoroan-sira tama mai Timor-Leste liuhosi postu fronteira Batugade, Bobonaro, domingu (05/04/2020). Imajen/Eugénio Pereira

Estudante Timoroan na’in 58 ne’e, sábadu (04/04/2020), konsentra iha Konsuladu Timor-Leste iha Atambua, Indonézia, ohin, Konsuladu Timor-Leste ba Kupang, Jesuíno dos Reis Matos “Zito” ho Konsuladu Timor-Leste ba Atambua, João Simão Sousa, koordena ho autoridade Indonézia nian hodi lori sira hakur tama mai fronteira Batugade.

To’o iha ponte boot, fronteira Timor-Leste nian, mosu dezentendimentu uitoan tanba portaun boot tama-mai Timor-Leste nian taka ona hodi la autoriza estudante-sira tama-tan.

Estudante-sira ne’e halo reasaun hodi protesta tanba  lamenta ho desizaun governu nian ne’ebé la autoriza ona sira tama hodi haruka sira fila-fali ba Atambua hodi hein too kurta (08/04/2020), maka foin tama.

Konsuladu Timor-Leste ba Kupang, Jesuíno dos Reis Matos “Zito” foti reasaun hodi ‘obriga’ tenke fasilita ona estudante Timoroan-sira ne’e tama kedas tanba daudaun ne’e autoridade lokál no abitante sira iha Motain no Atambua la fó autorizasaun ba estudante-sira ne’e atu toba ka hela iha otél sira iha Atambua.

“La iha ona solusaun atu husik ita-nia estudante-sira ne’e iha ne’e, tanba governu no autoridade Atambua rasik la autoriza estudante-sira atu hela fila-fali ba iha Atambua, no ami rasik iha konsuladu la iha fatin no dezde horiseik too agora estudante-sira mai, ami buka solusaun koordena ho Migrasaun Indonézia-sira autoriza ona sira tanbasá maka too ona ita nia rain, sira labele tama,” afirma  Konsuladu Zito bainhira akompaña estudante-sira atu tama mai Batugade.

Estudante Timoroan-sira, tama-tan mai Timor-Leste liuhosi postu fronteira Batugade, Bobonaro, domingu (05/04/2020). Imajen/Eugénio Pereira

Iha asaun protestu no dezentendimentu ki’ik ne’e, Estudante Universitáriu Institutu Teknolojia Surabaya (ITS) Indonézia, Beatris Marques, Efren do Carmo da Silva no estudante-sira seluk husu atu governu tenke fó autorizasaun ba sira tama, tanba sira deside fila ba Timor-Leste hodi prevene-an hosi propagasaun Coronavirus ka COVID-19 iha Indonézia.

“Ami sidadaun Timor-Leste iha direitu atu fila mai Timor-Leste. Se governu la autoriza ami prontu halo nafatin asaun no hamriik iha ne’e too Governu loke dalan, tanba ami la’ós moras maka mai, maibé ami fila atu prevene-an hosi moras,”  hateten estudante Beatrís Marques.

Durante minutu-30 nia-laran, Konsuladu Timor-Leste ba Kupang ho Atambua ho estudante-sira tenke sakrifika-an hamriik iha loron manas  hodi hein Komandante Polísia Unidade Patrullamentu Fronteira (UPF), Superintendente João Belo dos Reis, akompaña hosi Komandante Polísia Munisípiu Bobonaro, Superintendente Xefe, Octavio Bucar, kontkatu mai Komandante Jerál PNTL, Komisáriu Faustino da Costa, Prokuradór Jerál da Repúblika, José Ximenes no Ministru Defeza no Ministru Interiór interinu, Filomeno de Jesus da Paixão, hodi buka solusaun.

“Alin sira tenke mantein kalma, ha’u kontaktu ita nia lideransa-sira para buka solusaun. Imi hanesan estudante nu’udar mós sidadaun Timoroan iha direitu atu tama ita-nia rain,” dehan Komandante João Belo hodi akalma situasaun estudante sira-nian.

Liu tiha minutu 15, Komandante João Belo entrega kedas telefone ba Konsuladu Timor-Leste ba Kupang,  Jesuíno dos Reis Matos “Zito” hodi konversa via telefone ho Komisáriu Faustino da Costa, hodi buka solusaun ba estudante-sira.

Hafoin rona tiha orden ne’e, Konsuladu Timor-Leste hato’o agradese ba serbisu Komandu Jerál PNTL liuhosi servisu UPF nian no Ministru Defeza no Ministru Interiór interinu, Filomeno da Paixão de Jesus, hodi kontaktu Ministru Negósiu Estranjeiru no Kooperasaun (MNEK), Dionisio da Costa Babo Soares, hodi fó autorizasaun ba estudante-sira bele tama.

Komandante João Belo koordena fali ho Diretór Jerál Servisu Migrasaun, Superintendente Xefe, Agostinho Gomes, hodi autoriza Servisu Migrasaun no UPF loke portaun boot hodi autoriza estudante-sira tama no kumpre nafatin regra estadu emerjénsia.

Estudante sira-ne’e mós tama forma liña hodi kumpre regra distánsia sosiál metru ida hodi ekipa Médiku uza ai-moruk líkidu disinfection hodi rega sira-nia liman no sira-nia ekipamentu.

Estudante-sira ne’e mós submete ba teste Infrared Thermometer hodi haree sira-nia kondisaun fíziku no la deteta sira sintoma moras ruma.

Daudaun ne’e, estudante-sira ne’e sei hein iha fatin kuarentena provizóriu Batugade nian para transporte sira mai Dili hodi lori hikas  sira ba fatin kuarentena sira ne’ebé governu prepara-ona iha Dili.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here