DILI, 05 abríl 2020 (TATOLI) – Kliente Eletrisidade de Timor-Leste (EDTL), liuliu kbiit laek no lian laek-sira, ohin, hato’o sira-nia apresiasaun no agradese boot ba Governu, liuliu Ministru Obras Publika (MOP), Salvador Eugénio Soares dos Reis Pires, ho tékniku-sira EDTL, ne’ebé halo esforsu ona hodi hato’o ba Konsellu Ministru (KM) para fasilita subsídiu pre-pagu eletrisidade $15.00 ba kada kliente EDTL iha territóriu Timor-Leste.
Notísia Relevante : Segunda, Kliente 160.555 Hahú Simu Subsídiu Pre-Pagu Eletrisidade Husi Hotline 12150
Tuir desizaun Governu nian ne’ebé fó sai ona hosi Ministru Salvador Eugénio Soares dos Reis Pires, katak, segunda aban (06/04/2020), bele hahú ona haruka sms (short message service) ba númeru 12150 atu bele hetan karrega subsídiu pre-pagu eletrisidade. Maibé, ohin mós kliente balun komesa haruka ona sms no simu ona subsídiu pre-pagu eletrisidade ne’e ho valor $15.00/kliente.
Maneira oinsá atu asesu ba token/pulsa subsídiu pre-pagu eletrisidade; hakerek EDTL# tau númeru kontadór, haruka ka sms ba 12150 no minutu balun nia-laran númeru pulsa sei manda tama-mai númeru telemovel, nune’e, karrega númeru sira ne’ebé tama iha telemovel ba kontadór.
“Ami apresia tebes ba Governu, liuliu Ministru Salvador ne’ebé hanesan jerasaun foun iha vizaun ida pertinente tebes fasilita fó subsídiu pulsa eletrisidade ba kliente hotu alias ba povu iha situasaun estadu emerjénsia ne’e,” hateten Mateus ho Adão de Jesus, bainhira dada-lia ho Ajénsia Tatoli, ohin, iha Comoro, Dili.
Apresiasaun hanesan mós hato’o hosi Jinho da Costa ho Albertina da Costa, nu’udar abitante iha Comoro, Dili, ne’ebé konsidera oferta ka subsídiu pulsa eletrisidade ne’e hanesan maneira ida hodi hatudu Governu nia interese ba povu iha situasaun difisil sira, liuliu iha estadu emerjénsia hodi luta kontra propagasaun peste letál Coronavirus ka COVID-19.
“Agradese dala uluk ba Governu no obrigadu ba Ministru Salvador ne’ebé hanesan jerasaun foun kontribui ona salvasaun ba reinu Timoroan ne’ebé mak enfrenta difikuldade iha estadu emerjénsia ne’e. Parabéns ba lider jerasaun foun,” hateten Martinha da Costa ho orgullu.
Jinho da Costa lia-tun dehan, populasaun hato’o agradesimentu no obrigadu ba governu ho Ministru Salvador Pires, tanba kumpre duni saida mak nia (Salvador-red) promete.
“Parabens MOP tanba bele lori governu manan hikas konfiansa hosi povu,” hateten Jinho da Costa.
Sentimentu orgullu no agradese ba governu, MOP ho EDTL, barak mós hato’o liuhosi rede sosiál Facebook. Ema-ua’in tebes hakerek iha sira-nia kronolojia Facebook hato’o obrigadu barak ba entidade relevante-sira ne’ebé bele fasilita subsídiu pulsa $15.00 ba kada kliente iha Timor-Leste iha ámbitu estadu emerjénsia.
Notísia Relevante : MOP Deside Fó Subsídiu Pre-pagu Eletrisidade $15 ba Kada Kliente Hamutuk 160.555
Jornalista : Nelson de Sousa
Editór : Francisco Simões
