Ekipa Gabinete Jestaun Krize hala’o reuniaun iha Sentru Konvensaun Dili. Imajen Tatoli/Egas Cristovão

DILI, 5 abríl 2020 (TATOLI)-Governu liuhosi Sentru Integradu Jestaun Krize apela ba Autoridade Lokál hanesan Xefe Suku no Aldeia atu apoiu Governu hodi kontrola movimentu sidadaun ba prevensaun pandemia globál COVID-19 iha Timor-Leste.

”Husu ba populasaun iha ida-idak nia Suku ka Aldeia no bairru nafatin hela metin iha uma no labele halibur malu iha grupu, nune’e ita bele evita moras corona ne’e iha rai-laran”, relata portavós Sala Situasaun Sentru Integradu Jestaun Krize, Sergio Lobo, ba jornalista sira iha Sentru Konvensaun Dili, domingu (5/4/2020).

Eis Ministru Saúde iha Mandatu Governu Konstitusionál daneen ne’e mós informa nia parte husu ona apoiu ba Ofisiál Polisiamentu Suku (OPS) atu kontrola movimentu sidadaun, liuliu joven sira tuur grupu, hemu tua hamutuk, loke muzika no seluk tan.

“Sentru Jestaun Krize hakarak apela nafatin ba komunidade katak kumpre nafatin saida mak regula ona iha dekretu Governu ne’ebé fó sai iha Estadu emerjénsia nian”, tenik Lobo.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here