DILI, 05 abríl 2020 (TATOLI)-Ema na’in 62 mak daudaun ne’e kuarentena hela iha ró-laran.
Notísia Relevante : Ema Na’in 164 Sei Livre Hosi Kuarentena Obrigatóriu
Portavós Sala Situasaun, Sentru Integradu ba Jestaun Krize, Sergio Lobo, ohin, informa, ró ne’ebé tama mai Timor-Leste hamutuk haat, kompostu hosi ró-ida naran Martindo Perkasa hosi Kupang ho nia traballadór na’in 11 ne’ebé tama-mai iha loron 01 abríl 2020.
Ró Mekong hosi Vietname iha traballadór hamutuk na’in 14 no tama iha loron 02 abríl, ró Antung mai hosi Indonézia traballadór hamutuk na’in 21 no tama mai Timor-Leste iha loron 02 abríl no ró ida-seluk mak New Glory mai hosi Surabaya, Indonézia ho nia traballadór na’in 16 no tama mai Timor-Leste iha loron 3 abríl 2020.
Ba jornalista-sira iha Sentru Mídia Prevensaun COVID-19 iha Sentru Konvensaun Dili (CCD), Sergio Lobo informa, ema-hirak kuarentena iha ró-laran hetan asisténsia hosi Ministériu Saúde hodi destaka médiku ida no enfermeiru ida iha Portu Dili hodi halo vijilánsia ba sira.
“Bainhira sira enfrenta problema ruma, sira fó hatene ba vijilánsia sira entaun médiku enfermeiru hetan apoiu tomak ba sira iha kuarentena ró hirak nee,” hateten Sergio Lobo.
Jornalista : Felicidade Ximenes
Editór : Francisco Simões
