Portavóz CET no Arcebispo Metropolitana Dili, Dom Virgílio do Carmo da Silva. Imajen Tatoli/Cipriano Colo

Mota sira la hemu fali bee ne’ebé suli hosi mota ne’e rasik. Ai sira la han hosi fuan ne’ebé mai hosi nia huun rasik. Loron la fó naroman ba nia an rasik. Aifunan sira la hatudu sira-nia morín ba nia an rasik. Moris ba sira seluk mak regra natureza ninian. Ita hotu la moris ba ita-nia an maibé moris ba ema seluk. Maski susar oinsá ba mós, ho kontente no bele sai di’ak liután bainhira ema seluk kontente (Papa Francisco). 

DILI, 05 abríl 2020 (TATOLI)–Arsebispu Arkedioseze Metropolitana Dili, Dom Virgílio do Carmo da Silva, SDB, fó hanoin ba sarani sira katak atu prevene pandemia COVID-19, úniku no dalan di’ak liu mak rona malu. 

“Laiha dalan ne’ebé di’ak liu atu prevene CIVID-19 mak rona malu. Jesus hatudu ida ne’e iha semana Santa, katak, rona, no halo tuir to’o mate iha krús. Jesus halo to’o ema saran nia ba mate tanba nia hadomi ita, no nia hakarak atu ita hadomi nia, hadomi mós ema seluk. Jesus ninia humildade, haraik an, obediénsia hodi halo tuir to’o mate. Husu ita sarani iha momentu ida ne’e atu halo tuir no rona malu,” Arsebispu Dom Virgílio do Carmo da Silva, SDB, fó hanoin ba sarani sira liuhosi omilia misa Domingu Ramos iha Igreja Nossa Senhora Immaculada da Conceição, Katedrál, Vila Verde, Dili, domingu ne’e.

Nia esplika, ohin leitura husi São Mateus haktuir kona-ba Jesus ninia paixaun, haktuir kona-ba ema ninia krueldade. Jesus rekoñese buat hotu ne’ebé nia halo iha ninia moris, bainhira sei moris iha rai ida ne’e, signifika Nia haklaken liafuan foun ba ema oin-oin iha ninia moris.

“Infelizmente ema-nia fuan sei toos atu simu Maromak no rekoñese Maromak. Hahalok hirak ne’e seidauk bele konvense tanba ita ema-nia fuan sei toos ba Maromak nia liafuan. Saida tan mak tenke halo atu nune’e bele hamamar ita-nia fuan ne’ebé toos hanesan fatuk. Jesus rasik depois de halo buat hotu, nia husik de’it liafuan ida iha krús tutun molok husik iis mak, Elí Elí Lama Shabathani,” Arsebispu subliña.

Nia subliña liutá, situasaun COVID-19 tulun sarani hotu atu selebra Semana Santa ho maneira espesiál maibé bele mós iha sentidu ne’ebé espesiál liután, bainhira ema Koko la’o hamutuk ho Jesus Kristu husi ida-idak nia fatin.

Nia fó ezemplu katak, ameasa pandemia COVID-19 ninian, só bele konkista no halo tuir instrusaun sira ne’ebé Organizasaun Mundial Saúde (OMS) fó, nune’e mós buat ne’ebé governu ezije ona, norma simples ne’ebé husu atu hakmatek iha ida-idak nia uma no hela fatin mesa-mesak.

“Semana ida ona ita iha situasaun emerjénsia. Ha’u observa katak ema barak hakaas aan atu halo tuir Saida mak haktuir nu’udar regra Estadu Emerjénsia, maibé balun mós seidauk hakaas an atu halo tuir. Ita haksolok tanba situasaun COVID-19 iha ita-nia rain sei bele kontrola to’o iha momentu ida ne’e. Ne’e hatudu timoroan hotu kiik ka boot, kobtribui luta halakon situasaun ida ne’e. Ne’e Ita hotu ninia responsabilidade no unidade. Tanba funu ida ne’e, ita bele manan bainhira ita hotu hatene rona no halo tuir orientasaun,” nia hateten.

Iha biban ne’e, nia haforte mensajen ida ne’e hodi sita Amu Papa Francisco ninia liafuan kmanek ne’ebé Amu Papa haktuir iha loron hirak liu ba ne’e, hodi lori sarani sira refleta.

“Ha’u hakarak sita Amu Papa ninia liafuan oan ida iha loron hirak ne’e. Mota Sira la hemu fali bee ne’ebé suli hosi mota ne’e rasik. Ai Sira la han hosi fuan ne’ebé mai hosi nia huun rasik. Loron la fó naroman ba nia an rasik. Aifunan Sira la hatudu sira-nia morín ba nia an rasik. Moris ba sira seluk mak regra natureza ninian. Ita hotu la moris ba ita-nia an maibé moris ba ema seluk. Maski susar oinsá ba mós, ho kontente no bele sai di’ak liután bainhira ema seluk kontente,” nia haktuir.

Nia hateten, liafuan hirak ne’e enkoraja ema, sai di’ak liután iha idaidak nia papél iha momentu ida ne’e, no ida nee mak São Paulo fó hanoin ho lia fuan Ghenesis katak, hamamuk an tanba Kristu no Haluha an tanba ema hotu nia di’ak.

Misa Domingu Ramos tinan ne’e iha Igreja Katedral Nosa Senhora Inmaculada da Conceição Villaverde Dili, prezide husi Arsebispu metropolitana de Dili, Dom Virgílio do Carmo da Silva, SDB, konselebrante Munseñor José António da Costa, Padre Leandro María Alves, Padre Bento Barros Perrera ho diákonu Helio da Costa Nunes no diákonu Melchior Falo.

Korru ne’ebé responsabiliza misa Domingu Ramos ohin, maka, Korru Juikat Katedral.

Notísia Relevante: Partisipa Misa Hosi Uma, Rekopera Ralasaun Família

Jornalista  : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here