Portavóz CET no Arcebispo Metropolitana Dili, Dom Virgílio do Carmo da Silva. Imajen Tatoli/Cipriano Colo

DILI, 05 abril 2020 (TATOLI)–Arsebispu Metropolitana Dili, Dom Virgílio do Carmo da Silva, SDB, husu sarani sira liuliu sarani Parókia Nossa Senhora Inmaculada da Conceição Katedral Dili, atu durante Semana Santa, akompaña de’it misa hosi uma hodi prevene pandemia COVID-19, labele da’et ba ema seluk, tuir instrusaun hosi Organizasaun Saúde Mundiál (OMS). 

“Ikus liu, ha’u hakarak husu favor boot ida liuliu sarani parókia Katedrál ninian, atu hakaas aan, ida-idak tuir misa husi uma hodi akompaña hosi televizaun. Husu sarani sira hotu, imi sira ne’ebé mai iha (igreja) ne’e, ema barak haree katak Katedrál ema barak mai tuir misa ona, ha’u husu atu Kinta Feira Santa to’o Domingu resureisaun, ida-idak tuir misa hosi ida-idak nia fatin,” dehan Arsepispu Metropolitana Dili, Dom Virgílio do Carmo da Silva, SDB, iha ninia omilia nia rohan iha misa Domingu Ramos nian iha Igreja Katedrál, Vila verde, Dili, domingu ne’e.

Bibi atan nee ekoraja katak, maski ema hotu senté todan maibé tanba situasaun ne’e obriga, nune’e Primeira vez Igreja suspende hodi halo no partisipa misa liuhosi televizaun.

“Ne’e La’ós buat baibain maibé situasaun ne’e ninia todan rasik mak obriga ita hotu atu halo sakrifisiu boot ida ne’e. Ida ne’e mak ita-nia kuarezma. Ida ne’e mak ita-nia krúz ne’ebé mak ita lori, iha Semana Santa. Bainhira ita hakaas an hotu-hotu hamutuk, hanesan São Paulo hateten katak la’ós hanoin ba ema ida-idak nia fiar no interese maibé hanoin ba ema hotu nia di’ak,” Dom Virgílio husu.

Misa Domingu Ramos tinan ne’e hala’o iha Igreja Katedral Nosa Senhora Inmaculada da Conceição, Villa Verde Dili, prezide hosi Arsebispu Metropolitana de Dili, Dom Virgílio do Carmo da Silva, SDB, konselebrante Munseñor José António da Costa, Padre Leandro María Alves, Padre Bento Barros Perreira ho diákonu Helio da Costa Nunes no diákonu Melchior Falo.

Korru ne’ebé responsabiliza ba Misa Domingu Ramos, ohin, mak Korru Juikat Katedral.

Tuir observasaun TATOLI, hatudu katak, maski iha situasaun estadu emerjénsia no situasaun aplikasaun distánsia sosiál hodi prevene COVID-19, maibé sarani sira balun sei partisipa direta iha Igreja Katedral. Maske nune’e, sarani kuaze ema rihun ida resin mak akompaña Misa Domingu Ramos liuhosi live streaming GMN TV.

Notisia Relevante: Preparasaun Molok Tuir Misa Liuhosi Meiu Komunikasaun Sosiál

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here