Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 04 abríl 2020 (TATOLI) – Koordenadór Ofisiál Ligasaun Forsa Tarefa COVID-19, Rui Maria de Araújo, relata katak teste laboratóriu sei halo ba ema ruma bainhira hatudu sintoma kona-ba surtu COVID-19 no bainhira ema ne’e halo viajen husi fatin ne’ebé afetadu no mós kontaktu besik ho ema ne’ebé pozitivu Coronavírus.

Rui Maria de Araújo esplika asuntu hirak ne’e, relasiona ho preokupasaun pesoál seguransa no defeza sira ne’ebé oras ne’e daudaun hala’o knaar iha fronteira no fó atendimentu ba sidadaun sira ne’ebé mai hosi rai-li’ur, liuhosi terrestre, marítima no aéreu.

“Ami rejista preokupasaun sira ne’e, maibé protokolu estandar ne’ebé iha dahuluk ita só halo teste laboratóriu ba ema ne’ebé hatudu sintoma no iha istória halo viajen bá fatin afetadu, inklui iha istória iha kontaktu besik ho ema ne’ebé pozitivu. Tanba preokupasaun hosi ofisiál saúde, seguransa, orden públika no FALINTIL-Forsa Defeza Timor-Leste (F-FDTL) iha liña oin no preokupasaun ne’e iha, maibé ekipa vizilánsia epidemiolójika Ministériu Saúde nian atentu nafatin bainhira ema sira ne’ebé tama mai karik teste pozitivu, sei buka hatene hotu fali kontaktu sira ne’ebé sira halo no husi ida ne’e mak halo prosesu atu halo ezame médiku”, dehan Koordenadór liuhosi Sentru Mídia COVID-19 iha Sentru Konvensaun Dili (CCD, sigla portugés), sábadu ne’e.

Maski nune’e, eis Ministru Saúde ne’e afirma, sientifikamente transmisaun moras ne’e akontese duni hosi ema ne’ebé seidauk hatudu sintoma no bele ona transmite moras, maibé prosedimentu atu halo buat ne’ebé bolu dehan contact tracing ne’e hafoin iha ona ema ne’ebé pozitivu.

“Entaun tenke buka hotu ema sira ne’ebé iha kontaktu ho ema pozitivu ne’e atu halo avaliasaun hotu”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here