Arguidu MDC partisipa primeiru audiénsia julgamentu interrogatóriu iha TDD, sabádu (04/04/2020). Imajen/Nelson de Sousa

DILI, 04 abríl 2020 (TATOLI) – Tribunál Distritál Dili (TDD), ohin, liuhosi primeiru audiénsia julgamentu interrogatóriu, aplika medida koasaun aprezentasaun periódika ba arguidu MDC, ne’ebé lori karreta Grand-Max tenta korta no deskonfia atu soke karreta Primeiru-Ministru PM Taur Matan Ruak,iha area Eskola Paulo VI, Dili.

Notísia Relevante : PNTL Detein Suspeitu MDC Tenta Soke Karreta PM Taur

Tuir faktu ne’ebé arrola hosi Ministériu Públiku (MP) katak, asidente tráfegu ne’e akontese iha loron 01 abríl 2020, lokraik, bainhira arguidu MDC kondús karreta ho xapa matrikula A.22-180 TL ho kondisaun lanu (alkóliku) tenta korta karreta PM Taur Matan Ruak nian iha area Eskola Paulo VI nian, maibé eskolta ba PM Taur ho lalais korta hikas karreta ne’ebé arguidu kondús, ho nune’e, soke fali karreta seguransa PM Taur nian.

Ministériu Públiku promove arguidu ho krime rua; atentadu hasoru órgaun soberanu nia reprezentante másimu iha artigu 203, númeru 1 kódigu penál Timor-Leste ho nia moldura penál bele hetan kastigu hosi tinan ualu (8) to’o tinan 20.

Krime seluk mak arguidu komete tanba karta kondusaun inválidu no seidauk renova ne’ebé previstu iha artigu 207 kódigu penal Timor-Leste. Tanba ne’e, Prokuradór Alfeu Morreira,  husu ba Tribunál atu aplika prizaun preventiva.

Defeza Manuel Exposto ne’ebé fó asisténsia legal ba arguidu MDC hateten, rajaun Tribunál aplika medida koasaun aprezentasaun periódika ba nia kliente iha duni indísiu balun, maibé kuandu refere ba motivasaun Tribunál seidauk iha serteza katak arguidu hakarak iha duni motivu atu kauza ka prejudika Primeiru-Ministru iha altura ne’ebá.

Nia dehan, tanba haree hosi sirkunstánsia-sira ne’e momentu ne’ebá arguidu hatete ho kondisaun lanu, ho nune’e, labele kontrola-an.

Nia hatutan, Tribunál aplika medida koasaun aprezentasaun periódika ba arguidu kada segunda to’o sábadu hodi ba aprezenta-an iha eskuadra polísia ne’ebé besik.

Notísia Relevante : PNTL Konsidera Suspeitu MDC Halo Tentativa Soke Karreta PM Taur

Ho desizaun primeiru instánsia nian ne’e mak hetan insatisfasaun hosi MP maka iha loron 15 nia-laran MP bele hatama rekursu.

Audiénsia  primeiru interrogatóriu ne’e prezide hosi Juis Maria Solana, Ministériu Públiku reprezenta hosi Prokuradór Alfeu Morreira no arguidu MDC hetan asisténsia legál hosi Defensór Públiku Manuel Exposto.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here