Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 04 abríl 2020 (TATOLI) – Governu liuhosi Gabinete Integradu Gestaun Krize finaliza ona polítika teste masal ba populasaun iha territóriu Timor-Leste no tempu besik sei realiza ona teste ne’e.

“Kona-ba teste masal, polítika ba ida-ne’e finaliza ona, dahuluk ekipa analiza estudu ne’ebé integra mós iha Sala Situasaun iha Sentru Integradu Gestaun Krize nian no halo ona estudu atu aprezenta argumentasaun sientífika, inklui halo konsulta mós ho Organizaun Mundiál Saúde (OMS), hafoin halo ona preparasaun lojístika nian liuhosi prepara atu sosa reajente ne’ebé sufisiente atu halo teste masal”, relata Koordenadór Ofisiál Ligasaun Forsa Tarefa COVID-19, Rui Maria de Araújo liuhosi Sentru Mídia COVID-19 iha Sentru Konvensaun Dili (CCD, sigla portugés), sábadu ne’e.

Nia esplika, kona-ba disinfettante atu disinfetta ema-nia isin ne’e laiha efetividade.

“Organizasaun Mundiál Saúde (OMS) fó sai ona katak ita presiza disinfetta atu rai iha servisu fatin no sira ne’ebé hambrik iha uma karik, fatin ne’ebé kaer atu tama ba odamatan sira ne’e normalmente ema ninia liman kaer fatin bele husik hela vírus, entaun presiza disinfetta”, dehan Rui Maria de Araújo.

Maibé, eis ministru ne’e subliña disinfetta diretamente ba ema, tuir evidénsia sientífika ne’ebé OMS hato’o laiha efetividade, signifika mesmu disinfetta tiha ema ne’e no ba troka tiha roupa, maibé bainhira iha kontaktu ho ema ne’ebé iha vírus karik, virus ne’e bele kona filafali iha nia roupa.

Tanba ne’e, nia bolu atensaun ba populasaun hotu katak meiu transmisaun husi vírus ne’e maka’as liu maka husi liman.

“Bainhira liman tau ba ibun, matan, no inus maka vírus ne’e bele tama ka ko’alia besik tebes ho ema ida iha ona vírus ne’e, entaun bele transmite diretamente. Dala-ida tan hato’o ba públiku vírus ne’e la transmite liuhosi anin”, nia realsa.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here