Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 04 abríl 2020 (TATOLI) – Liuhosi Sentru Integradu Gestaun Krize (CIGC, sigla portugés) iha Sala Situasaun, Koordenadór Ofisiál Ligasaun Forsa Tarefa COVID-19, Rui Maria de Araújo, relata suspeitu ba surtu COVID-19 iha Timor-Leste to’o sábadu meudia tuku 12 mantein na’in-42.

“Dadus ohin ninian to’o meudia tuku 12, kona-ba sira ne’ebé kompleta ona loron 14 aumenta tan na’in-neen, kompara ho horiseik hamutuk 336 no sira ne’ebé sei iha konfinamentu obrigatóriu ka kuarentena to’o ohin tuku 12 hamutuk 1.123 kompara ho horseik amenta na’in-27 iha kuarentena”, informa Koordenadór ne’e liuhosi Sentru Mídia COVID-19 iha Sentru Konvensaun Dili (CCD, sigla portugés), sábadu ne’e.

Eis Ministru Saúde ne’e haktuir tan, totál ema ne’ebé suspeitu laiha mudansa ka mantein hanesan horiseik, katak nafatin na’in-42, ema ne’ebé provável ka sei hein ninia rezultadu laboratóriu iha na’in-ualu to’o tuku 12 ohin no ema ne’ebé konfirmadu sei pozitivu vírus COVID-19 sei mantein na’in-ida.

Nia realsa, ema ne’ebé negativu husi horiseik to’o ohin meudia amenta tan na’in-ida husi rezultadu ne’ebé mai husi laboratóriu, nune’e totál kumulativu sira ne’ebé negativu hamutuk na’in-33.

“Pontu importante ne’ebé Sala Situasaun hakarak subliña ba públiku tomak maka iha tuku 24 nia laran laiha suspeitu foun, kazu konfirmadu sei nafatin ida no Ministériu Saúde ninia ofisiál sira nafatin servisu iha fatin entrada hotu no mós kuarentena iha Dili inklui iha munisípiu sira”, dehan Rui Maria de Araújo.

Eis Primeiru-Ministru ne’e adianta, CIGC kontinua rekomenda ba populasaun tomak iha Timor-Leste nia laran atu nafatin halo konfinamentu voluntáriu.

“Signifika lalika sai husi uma bainhira la presiza no lalika halibur malu liuhosi ema na’in-lima bainhira presiza duni halibur malu karik hanesan iha lia-mate ruma labele grupu boot demais, tanba lei hatete ona katak másimu ema na’in-10 no bainhira halibur malu karik nafatin mantein distánsia mínimu metru ida, uza máskra nafatin hafoin halibur malu tiha no fila bá uma keta haluha fase liman ho sabaun, keta haluha liman lalika kose ba matan, ibun no ba inus, tanba liuhosi liman mak ita bele hada’et moras husi li’ur mai ita nia-an”, nia subliña.

Nia dehan tan, CIGC mós atu apela ba populasaun tomak atu nafatin kalma tanba servisu hotu ne’ebé ekipa sira iha terrenu hala’o orientadu ona atu prevene COVID-19 labele amenta maka’as liután.

“Iha ida mak pozitivu, nia izoladu, nia seidauk hada’et ba ema seluk. Signifika iha li’ur ne’e provavelmente seidauk iha ema ne’ebé infetadu. Ha’u dehan provavelmente tanba ita laiha serteza loloos, iha Organizasaun Mundiál Saúde (OMS) atualiza balun ne’ebé fó sai ikus, vírus ne’e bele transmite mós liuhosi ema ne’ebé seidauk hatudu sintoma, signifika ema ne’e hada’et nia-an ona husi vírus no nia seidauk isin manas, seidauk mear, kakorok seidauk moras, seidauk hatudu sintoma sira seluk, kona-ba infesaun respiratória aguda mós nia bele ona hada’et moras ne’e ba ema seluk”, subliña Portavós CIGC COVID-19 ne’e.

Nune’e, CIGC nafatin rekomenda ba populasaun tomak halo distánsia sosiál, no mós ijiene pesoál.

Jornalista: Antónia Gusmão

Editora: Julia Chatarina

1 KOMENTÁRIU

  1. aprecia se ser comunidade ka cidadaun ida fo responsavel ba nia aan no timoroan hotu hodi fo distancia ba malu no kuidadu saude nafatin, selae maka ita susar hodi hasoru pandemia ida ne’e. ita ho numeru populasaun ne’ebe ki’ik tan ne’e fasil atu kontrola (karik ne’e tuir ita nia goveru nia hanoin) maibe susar nafatin see ema hotu sei la halo tuir regras Autokuarantina. ha’u haree rasik, ema barak hahú halo fali movimentu ho ema nain2 ka liu, hahu loke fali lojas sira ne’ebe la faan nesesidade baziku sira, halo grupu tuur no sem regras distancia, no seluk taan.

    Ne’e signifika saida see regras Lockdown ne’e sei too iha dia 26 de abril?

HAKEREK NO HATÁN

Please enter your comment!
Please enter your name here