Portugés sira iha Timor Leste, aranka ba Portugál ho Aviaun EuroAtlantic, sábadu (04/04). Imajen Tatoli/António Gonçalves

DILI, 04 abríl 2020 (TATOLI) – Sidadaun Portugál na’in-211 ohin husik hela Timor-Leste ho aviaun EuroAtlantic tanba kauza pandemia COVID-19.

Aviaun Air Bus ne’ebé mai tula pasajeiru portugés sira ne’e ohin tun iha Aeroportu Internasionál Nicolau Lobato, Comoro, maizumenus tuku 7:30 oras Timor-Leste.

Hafoin akomapaña portugés sira fila, ba sira nia-nia rain, Prezidente Konsellu Administrasaun Autoridade Navegasaun Aéreu (ANATL), Romualdo da Silva, informa katak Aviaun EuroAtlantic mai tula portugés sira, kompostu husi profesór no diplomata sira no seluk tan ne’ebé hela Timor-Leste, hodi lori filafali bá Portugál.

“Totál pasajeiru ne’ebé maka ohin tula husi aviaun ne’e hamutuk 211, kompostu husi ema boot hamutuk 198 no labarik kiik-oan sira hamutuk 12 no inklui bebé ida, ne’ebé hamutuk 211”, dehan  Prezidente ANATL hafoin akompaña iha Aeroportu Comoro, sábadu ne’e.

Nia dehan, sasán bagajen husi pasajeiru na’in-211 nian hamutuk kuaze tonelada haat no totál pasajeiru nia sasán hamutuk 19.458.

Kona-ba aterasaun aviaun boot ne’e rasik tun ho di’ak tebes no la iha problema iha Aeroportu Internasionál Prezidente Nicolau Lobato tanba aviaun ne’e rasik mai ho kondisaun mamuk.

“Ha’u koordena ho parte torre aviaun nian no husu ba sira, parte servisu torre nian informa mai ha’u buat hotu la’o ho di’ak no aviaun tun ho di’ak no laiha problema”, nia haktuir.

Iha fatin hanesan, Embaixadór Portugál iha Timor-Leste, José Pedro Maichado Vieira, dehan Aviaun EuroAtlantic mai atu tula portugés iha Timor-Leste fila ba Portugál espera bele to’o iha Portugál ho di’ak.

“Ita espera aviaun ne’e sei la’o ho di’ak durante voo husi Dili ba Lisboa.

Entertantu, Aviaun EuroAtlantic nia rute sai husi Dili tuku 8:30, sei liu Tailándia, hafoin liu bá Lisboa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here