Vigáriu Jerál Monseñor José António da Costa. Imajen Tatoli/Julia Chatarina.

DILI, 04 abril 2020 (TATOLI)–Arkedioseze Metropolitana Dili liuhusi Vigáriu Jerál Monseñor José António da Costa fó sai ona instrusaun prátika kona-ba partisipasaun misa iha uma liuhosi Meiu Komunikasaun Sosiál sira hanesan rádiu, televizaun no online. 

Instrusaun ne’e husu sarani sira atu partisipa ativa no konsiente hanesan partisipa direta iha igreja laran, la’ós atu haree (nonton) televizaun ka rona rádiu no ko’alia ba malu, hemu kafé ka buat seluk tan.

Aleinde ne’e, preparasaun esteriór hanesan hatais dignu maski la’ós formál, no interiór ka fuan nian hanesan partisipa misa iha igreja molok partisipa misa online.

Husu atu sarani sira hili fatin ne’ebé di’ak, bainhira hamutuk ho membru família bele iha sala vizita ka fatin adekuadu sira seluk. Partisipa mesak karik, buka fatin hakmatek ne’ebé ema seluk labele perturba hanesan fatin orasaun ka iha fatin seluk ne’ebé bele asesu internet.

Iha komunikadu ne’e, husu atu sarani sira partisipa misa ho kompletu hahú hosi entrada to’o finál no labele tuir parte balu de’it, tenke nakonu ho konsentrasaun, husik atividade sira seluk no labele atende telefone.

“Prepara ambiente orasaun liuhosi orasaun pesoál antes partisipa misa online. Por favór partisipa misa ho pozisaun “tuur”, la persiza hamriik ka hakne’ak. Di’ak tebes se iha fatin orasaun iha meza ida ho krusifixu ho lilin ne’ebé lakan. Partisipa misa ho seriedade no devosaun tomak. Hatán diálogu hotu ne’ebé korresponde ba sarani sira-nia parte,” komunikadu ne’e haktuir kona-ba instrusaun ne’e liuhosi komunikadu ofisiál ne’ebé vigora iha loron 4 fulan abril tinan 2020.

Iha komunikadu ne’e mós fó hanoin katak durante komuñaun, sarani sira halo orasaun pesoál no reza orasaun “Komuñaun Espirituál”:

Ha’u-nia Jesus

Ha’u fiar Ita-Boot horik duni iha Sakramentu Eukaristia

Ha’u hadomi Ita-Boot liu sasán hotu

Ha’u hakarak tebes Ita-Boot hiit-An mai ha’u laran

Tanba agora ha’u labele simu Ita-Boot iha Sakramentu Eukaristia

Hiit-An mai bá…

Espiritualmente iha ha’u fuan

Hanesan Ita horik duni ona iha ha’u laran.

Notísia Relevante: CET Deside Sarani Sira Akompaña Misa Paskál Liuhosi Rádiu no Televizaun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here