EuroAtlantic Boeing 767-300ER. Imajen Tatoli/Hortencio Sanchez

DILI, 04 abríl 2020 (TATOLI)–Pilotu aviaun EuroAtlantic, Mário Jorge Faria, hateten maski Timor-Leste (TL) nia pista ki’ik (naruk metru 1850 de’it) maibé nia toman ona atu tun. Normalmente, aviaun refere tun iha pista ho nia naruk metru 2400 ba leten.

“Pista Timor-Leste nian ki’ik maibé ami toman ona. Ha’u mai Timor-Leste dala tolu ona–2008, 2012 no 2020. Primeiru, ami tun iha Baucau tula forsa Guarda Nacional da Republicana (GNR) maibé ho aviaun la hanesan,” dehan pilotu ne’e ba jornalista iha Aeroportu Internasionál Prezidente Nicolau Lobato, Comoro, Dili, sábadu ne’e.

Nia dehan, pasajeiru portugés-sira ne’ebé sira sei tula hamutuk na’in-211 kompostu hosi bebé ida (1), ema boot 198 no labarik 12. Tuir rute aviasaun, ohin sai hosi Timor-Leste deskansa iha Thailándia hafoin aranka tutan bá Portugal.

Aviaun ho marka Boeing 767-300ER  ne’ebé ho kapasidade transporta pasajeiru hosi na’in 181-375 ne’e to’o iha Timor-Leste ohin dadeer maizumenus tuku 7:22 otl no sei semo fali iha tuku 9:00 otl.

Jornalista: Hortencio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here