Komandante UPF, Superintendente João dos Reis Belo, sesta (03/04/2020), halo promosaun diviza ba membru UPF Kompañia Bravo-Suai, iha Aldeia Casabauk, Postu Administrativu Salele, Munisípiu Covalima. Imajen/Eugénio Pereira

SALELE, 04 abríl 2020 (TATOLI)- Komandante Polísia Unidade Patrullamentu Fronteira (UPF), Superintendente João Belo dos Reis, akompaña husi Komandante Kompañia Bravo Suai, Inspetór João Baptista Ferreira, sesta (03/04/2020), hala’o promosaun diviza ba membru UPF Kompañia Bravo Suai na’in 12  iha Aldeia Casabauk, Suku Salele, Postu Administrativu Suai, Munisípiu Covalima.

Notísia Relevante : Komandu UPF Promove Diviza Ba Ofisiál Superiór no Membru Na’in-54

UPF halo operasaun iha liña fronteira terrestre. Imajen/Eugénio Pereira

Membru-sira ne’ebé simu promosaun diviza ne’e kompostu hosi Ajente ba Ajente Prinsipál na’in-ualu (8), Ajente Prinsipál ba Ajente Xefe na’in-rua (2), Sarjentu ba Primeiru Sarjentu na’in-rua (2).

Promosaun diviza ho modalidade por eskolla ho antiguidade ne’e hala’o bazeia ba despaxu Komandu Jerál PNTL númeru 139/CG-PNTL /III/2020 ne’ebé aprova hosi Komandante Jerál PNTL, Komisáriu Faustino da Costa.

Komandante João Belo dos Reis, husu atu membru-sira kontinua presta serbisu no garante nafatin situasaun seguransa metin iha liña fronteira Covalima, liu-liu ajuda Estadu Timor-Leste prevene propagasaun pandemia Coronavirus ka COVID-19.

Nia dehan, promosaun ida ne’e hanesan pasu importante ida hodi rekoñese membru sira-nia dedikasaun.

“Promosaun ne’ebé maluk-sira ohin hetan, la’ós ema mai tau iha bandeja maka fó de’it ba maluk-sira, maibé ida ne’e liuhosi sakrifisiu boot ida. Tanba durante tinan-neen (6) maluk-sira esforsu-aan tau korridór  regulamentu disiplinár ne’ebé iha nune’e promosaun hetan tuir tempu determina,” afirma Komandante João  Belo dos Reis iha diskursu.

Operasaun ihaa liña fronteira terrestre hodi evita atividade ilegál tama-sai fronteira terrestre TL-RI. Imajen/Eugénio Pereira

Komandante João Belo dos Reis, husu atu membru-sira kontinua halo patrullamentu beibeik hodi kontrola movimentu atividade negósiu no atividade viajen populasaun nian,  liu-liu evita atu populasaun tama-sai hosi dalan ilegál.

“Ohin loron mundu no ita hotu preokupa nasaun Timor-Leste komesa afetadu daudauk, ita hou tenke serbisu makas liután, estadu presiza ita no povu tau matan hela ba ita, tanba ita maka halo seguransa iha fronteira ita tenke primeira liña tau responsabiliza atu asegura katak, liña fronteira ema ilegál la tama, liña fronteira tenke livre hosi atividade negósiu no movimentu ilegál,” Komandante João alerta.

João Belo mós apela ba komandante Kompañia Bravo-Suai, Komandante Postu Alfa- Tunubibi no Batugade, tenke fó garante ba estadu hodi tane serbisu ho responsabilidade no respeita nafatin regra no servisu tuir lei.

Tuir planu, iha tempu besik, Komandante UPF ne’e mós sei kontinua halo promosaun ba membru UPF-sira iha Postu Oe-Cusse nian.

Operasaun iha liña fronteira terrestre. Imajen/Eugénio Pereira

Iha fatin hanesan Komandante Kompañia Bravo Suai, Inspetór João Baptista Ferreira, hato’o agradese ba Governu no Komandu Jerál PNTL ho Komandante UPF ne’ebé kontinua tau atensaun másimu ba serbisu UPF nian, liu-liu promove diviza ba membru-sira hodi kontinua enkoraja membru-sira servisu ho profisionál, mezmu hasoru difikuldade oin-oin.

Parte seluk, Komandante ne’e mós relata serbisu UPF durante ne’e kaptura mós estudante Timoroan sira ne’ebé fila liu dala ilegál hodi entrega ba ekipa COVID-19 halo teste ba sira-nia saúde hodi evita propagasaun peste letál COVID-19.

Evidensia motor ne’ebé UPF halo apreensaun tanba hatama liuhosi dala n ilegál. Imajen/Eugénio Pereira

Durante halo kontrolu seguransa iha liña fronteira Suai nian, UPF halo mós apreensaun ba motór ilegál haat (4) ne’ebé populasaun sira hatama sein dokumentu, apreensaun mós ba mina ilegál no sasán nesesidade báziku, sigarru ilegál hanesan, LA, Sampoerna, Marlboro no Joker.

Notísia Relevante : UPF Halo Apreensaun ba Gazolina Bidón Haat, Sigarru no Adubu

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here