Serbisu nain, Mário de Deus. Imajen Tatoli/Cipriano Colo

DILI, 04 abril 2020 (TATOLI)–Serbisu na’in sira ne’ebé loro-loron ho kamioneta hodi raut foer iha Sidade Dili, presiza ekipamentu prevensaun atu bele proteje an hosi COVID-19, tanba loro-loron sira sempre raut foer ho tipu oin-oin mai hosi ema no fatin oin-oin iha Dili laran.

Serbisu na’in ne’ebé loro-loron hamoos sidade Dili, Mário de Deus (63) hateten, maski loro-loron hasoru susar ho terus oinsá mós sei esforsu an atu serbisu nafatin hodi halo Dili sai sidade moos maibé ami presiza liuliu mak ekipamentu ba protesaun.

“Nai ulun sira se bele haree ami-nia serbisu ne’ebé ami halo loro-loron. Ami presiza materiál protesaun ba ami-nia saúde. Tanba loro-loron ami raut foer ne’e risku boot mós ba ami-nia saúde. Ami raut foer ne’e, maihosi ema oin-oin, fatin oioin. Dala barak ami raut ho liman tanan deit, ami mós la uza máskara, ne’ebé perigu boot ba ami,” dehan Mário de Deus ba Ajénsia TATOLI iha Sentru Lixu Tibar, Postu Administrativu Bazartete, Munisípiu Liquiça, ohin.

Nia hatutan, ekipa ne’ebé serbisu, enfrenta difikuldade barak. Maski agora daudaun Governu fó orden  katak hotu-hotu tenke uza máskara maibé buat ne’ebé enfrenta agora maka Governu entrega responsabilidade ba kompañia no kompañia abandona hela tanba la prepara ekipamentu ruma.

“Kompañia haruka ami atu hola rasik maibé ami sira ne’ebe serbisu ho saláriu kiik, ami atu uza osan hira mak ami atu hola sasán sira ne’e no osan hira mak ami uza hodi han no hemu. Satán situasaun hanesan ne’e buat hotu karun, ne’e ami labele hola,” nia dehan.

Mário mós rekoñese katak, loloos tuir dekretu Governu nian ba estadu emerjénsia ne’e, serbisu nain hirak ne’e mós para serbisu. Maibé, tuir nia, sira labele para tanba bainhira husik tiha no para loron lima ka neen hanesan ne’e, Dili laran ne’e dalaruma COVID-19 seidauk to’o mai, ema bele mate hotu tanba lixu.

Serbisu nain sira raut foer. Imajen Tatoli/Cipriano Colo

“Tanba ne’e, ami mós luta nafatin atu hamoos tutuir maski situasaun Timor mak hanesan ne’e. Tanba ita nia nasaun ne’e mós hasoru problema barak ona. Agora daudaun mak Coronavirus nee mós mai tan, se ita husik foer nakonu iha Dili laran, nee Dili laran bele aat liu. Coronavirus bele da’et lalais mós hosi ema ida ba ema seluk. Fasil atu kona ita-nia abó sira, labarik sira no ema hotu,” nia haktuir.

Nia husu ho haraik an ba ema hotu neebe hela iha Dili, atu labele nara-naran soe foer arbiru maibé tenke hatoman an ona tau lixu iha ninia fatin tanba ne’e di’ak ba ema barak.

“Bainhira ita boot sira tau didi’ak lixu iha fatin ne’ebé prepara ona, sei fasilita di’ak liután ami atu bele ba raut ho karreta no lori ba sentru lixu Tibar. Loron ida, ami raut dala tolu hosi dadeersan too loraik,” nia haktuir.

Kamioneta ida ne’ebé Mário kondús hodi tula foer, ho serbisu na’in hamutuk ema na’in haat. Área ne’ebé Mário ho ekipa hamoos loro-loron mak hanesan área Kampu Alor, Dili.

Notísia Relevante: Laiha Estadu Emerjénsia ba Ekipa Saneamentu

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here