Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 04 abril 2020 (TATOLI) – Governu liuhosi reuniaun Konsellu Ministru iha kuarta (01/03), aprova ona deliberasaun ida hodi estabelese kontratu ho Programa Nasaun Unida ba Dezenvolvimentu (UNDP, sigla inglés) hodi sosa ai-moruk no ekipamentu ba prevensaun COVID-19.

Foin lalais ne’e, Primeiru-Ministru, Taur Matan Ruak deklara katak, antes Governu sosa aimoruk no ekipamentu sira ne’e sei halo koordenasaun ho Organizasaun Mundiál Saúde (OMS) hodi evita manipulasaun.

Notísia Relevante: Molok Sosa Ai-Moruk COVID-19, Governu Sei Husu Autorizasaun Husi OMS

“Prosesu sosa ai-moruk la’o hela no lista kompra dahuluk ba aviaun ne’ebé atu mai finaliza ona”, relata Koordenadór Ofisiál Ligasaun Forsa Tarefa COVID-19, Rui Maria de Araújo liuhosi Sentru Mídia COVID-19, iha Sentru Konvensaun Dili (CCD, sigla portugés), sábadu ne’e.

Eis Governante ne’e afirma, Oranizasaun Nasaun Unida (ONU) ninia servisu maka responsabiliza atu prosesa kompra sira ne’e hotu ho baze kontratu ne’ebé Governu asina tiha ona.

“Prosesu la’o hela, hein katak iha fulan ida-ne’e nia laran rona ona rezultadu pozitivu ruma. Maibé keta haluha katak daudaun ne’e merkadu internasionál kona-ba produsaun ai-moruk ho ekipamentu sira ne’e saturadu, signifika ema prodús no fó sosa hotu kedas. Entaun ita presiza kalma oituan no tau konfiansa nafatin ba UNDP atu halo prosesu kompra tanba sira iha rede internasionál ida atubele identifika sasán sira ne’ebé sosa no lori mai Timor-Leste”, dehan eis Ministru Saúde ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here