Konsuladu Timor-Leste ba Kupang, Jesuíno dos Reis Matos “Zito” ho Konsuladu Timor-Leste ba Atambua, João Simão Sousa, akompaña estudante-sira hosi Indonézia tama mai Postu Fronteira Batugade, Bobonaro. Imajen/Eugénio Pereira

BATUGADE, 04 abríl 2020 (TATOLI)- Konsuladu Timor-Leste ba Kupang, Indonézia, Jesuíno dos Reis Matos “Zito”, preokupa desizaun Governu Timor-Leste hodi autoriza Servisu Migrasaun loke fronteira terrestre semana ida dala ida iha loron kuarta feira ho tempu oras rua de’it.

Notísia Relevante : Estudante Timoroan 52 Tama-Tan Hosi Fronteira Batugade

Konsuladu Zito hateten, desizaun ne’e afeta makaas ba movimentu Timoroan, liuliu estudante Timoroan sira rihun ba rihun ne’ebé estuda iha universidade barabarak iha Indonézia hakarak fila-mai Timor-Leste tanba ta’uk ho propagasaun pandemia Coronavirus ka COVID-19.

Konsuladu “Zito” konsidera karta despaxu konjunta entre Ministériu Negósiu Estranjeiru no Kooperasaun (MNEK) ho númeru 02/III/2020 data 30 marsu, bainhira fó sai presiza iha konsultasaun ho konsuladu ka embaixada TL nian iha Indonézia  tanba kuaze loroloron estudante Timoroan entre na’in 50 to’o na’in 80 maka fila mai Timor-Leste too Motain, fronteira taka, nune’e estudante balun osan la iha atu hela otél sira iha Atambua no osan la iha sosa hahán.

Ho problema hirak ne’e, dala ruma halo estudante balun buka meius tenke la’o liu dalan ilegál para tama ba Timor-Leste.

“Karta sirkulár fó sai dehan, loke fronteira semana ida dala ida iha loron kuarta feira de’it ho tempu oras rua ne’e ami la aseita,” afirma Konsuladu Timor-Leste ba Kupang, Indonézia, Jesuíno dos Reis Matos “Zito” ba jornalista bainhira akompaña estudante Timoroan sira tama mai Timor-Leste liuhosi Postu Fronteira Batugade, Bobonaro, sesta (03/04/2020).

Konsuladu Atambua João Simão Sousa ho Konsuladu ba Kupang Jesuíno dos Reis Matos “Zito”  mós simu informasaun hosi abitante Atambua, Indonézia, halo protesta no la autoriza estudante Timoroan sira ne’ebé fila hosi Indonézia atu deskansa provizóriu iha otél balun iha Motain-Atambua, tanba ta’uk estudante sira-ne’e bele afetadu pandemia Coronavirus ka COVID-19 da’et  fali ba sira.

Notísia Relevante : UPF Kaer Estudante Timoroan 54

“Horiseik akontese problema, ita nia estudante na’in tolu mai hosi Solo atu hela provizóriu iha kediaman ida iha sorin ne’e, komesa mosu reasaun hosi povu Atambua sira lakohi atu simu sira, tanba ta’uk sira bele lori moras. Tanba ne’e, ha’u apela ba estudante-sira karik mai hosi Jakarta, Surabaya, Malang, Solo no Kupang,  tenke too mai direita iha postu Motain hein direita ho lalais para oras rua fronteira loke sira bele tama mai lalais atu labele tarde,” nia apela.

Hafoin mosu problema ne’e, Konsuladu “Zito” ho ekipa too kedas iha terrenu hodi buka solusaun rezolve problema ne’ebé estudante-sira enfrenta.

Konsuladu Zito mós apela ba estudante Timoroan hotu ne’ebé sei hela iha Indonézia bainhira hakarak fila ba Timor-Leste liu fronteira terrestre presiza atensaun.

Parte seluk, Konsuladu Zito husu ba abitante Timor-Leste espesiál liu ba estudante atu fila ba Timor-Leste bainhira hasoru problema ho pasaporte no dokumentu mate tenke hato’o ba Konsuladu iha Kupang no Atambua buka solusaun hodi evita estudante-sira ne’e halo viajen liu dalan ilegál fronteira Oe-Cusse, Suai no Motain nian.

Estudante Timoroan hamutuk ema na’in 27 mak hala’o-tan viajen hosi fronteira Motain tama mai Timor-Leste no ekipa COVID-19 ne’ebé destakadu iha Postu Fronteira Batugade halo tiha teste médiku lori sira mai hela iha fatin kuarentena iha Dili.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here