Imajen Espesiál.

BAUCAU, 04 abril 2020 (TATOLI)–Portavóz Zona Fatumaca, Xefe Suku Samalari Sorteiro Magno Siqueira informa, komunidade suku haat iha Fatumaca de Baixu hanesan Suku Gariuai, Wailili, Samalari no Suku Buibau hamutuk hodi hala’o rituál iha Suku Wailili hodi kombate pandemia COVID-19.

“Ohin, lia-na’in no autoridade lokál sira foti sasán lulik ne’ebé iha bee-matan Wailili hodi tau iha ‘Sama-Uruwatu’ nu’udar sinál ida hatudu demonstrasaun liuhosi rituál. Rituál ne’e hatudu katak ami komunidade sira husi suku haat ne’e hakribiit hodi kombate COVID-19 mosu iha ami-nia leet. Tanba ne’e, ohin, sasán lulik sira, ita hasa’e ba Maromak iha Sama-Uruwatu ne’e,” dehan Portavóz Zona Fatumaca, Xefe Suku Samalari, Sorteiro Magno Siqueira, ba Ajénsia TATOLI via telefone, sábadu ne’e.

Relasiona ho pandemia Covid-19, xefe suku ne’e hateten, suku haat ne’ebé mak eziste iha Fatumaca de baixu hamutuk ho lia-nain sira hodi halo serimónia rituál atu hadook moras at ne’e hosi komunidade sira.

“Ohin, ami suku haat hanesan Gariuai, Wailili, Samalari no Buibau hamutuk ho ita-nia lia-na’in sira hodi husu matak malirin liuhosi bee-lulik, fatuk-lulik, rai-lulik, ai-lulik no Maromak,” xefe suku ne’e hateten.

Imajen Espesiál.

Nia hatutan, objetivu hosi serimónia rituál ne’e atu satan netik pandemia COVID-19 hosi komunidade sira iha Zona Fatumaca de Baixu nian.

“Ami Fatumaca oan sira kompostu hosi lia-nain ho autoridade lokál no mós kumunidade hotu iha suku haat ne’ebé mak iha inisiativa rasik hodi kria serimónia rituál atu kombate Covid-19 ne’ebé mak fasil hamate ema no la koñese ema mak da’et ba,” nia hateten.

Normalmente, nia dehan, manu-aten ohin hatudu katak manu-aten di’ak tebes no fiar katak pandemia COVID-19 sei la tama no la hada’et ba komunidade sira iha Zona Fatumaca de Baixu nian.

“Ita husu lisensa ba rai-nain, rai-lulik no Maromak, nune’e manu-aten ohin hatudu pozitivu no ami fiar katak COVID-19 sei la tama no hada’et ba ita-nia komunidade sira iha fatin ne’e liuliu ami hosi suku haat ne’e no mós suku haat nia oan balu ne’ebé hela iha fatin dook,” nia dehan.

Imajen Espesiál.

Sasán lulik ne’ebé atu satan moras COVID-19 ne’e, nia dehan, sei tau iha ‘Sama Uruwatu’ iha Wailili no tolu seluk sei tau iha Suku Samalari, Buibau no Suku Gariuai, nune’e bele taka no hein nia oan sira iha suku haat refere.

“Ne’e hatudu katak ita iha ona mahon ida hodi satan netik ba moras at ne’ebé mak ita la espera atu da’et ba ita,” nia haktuir.

Iha serimónia ritual ne’e, nia esplika, lia-nain sira la halo promesa maibé ohin lori ai-han ka bukae hodi husu bensaun ba hodi hadook moras COVID-19 ne’e hosi komunidade sira.

“Manu haat mak ohin oferese ba. Manu rua oho tiha hodi haree nia aten no manu rua seluk, husik moris de’it atu nune’e bele hamaus no hadi’a futuru,” nia esplika.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here