Prezidente Komunidade Xineza Timor-Leste, Kathleen Gonçalves. Imajen Tatoli/Felicidade Ximenes

DILI, 04 abríl 2020 (TATOLI) – Relasiona ho loron Matebian Xina nian ne’ebé selebra iha sábadu ne’e, komunidade xineza iha Timor-Leste la halo selebrasaun loron ida-ne’e tanba situasaun Estadu Emerjénsia no pandemia COVID-19.

Prezidente Komunidade Xineza iha Timor-Leste, Kathleen Gonçalves, informa komemorasaun ne’e la realiza hanesan bain-bain tanba situasaun daudaun la permite.

“Sábadu, 04 abríl koñesidu nu’udar loron matebian Xina nian, maibé ami deside labele komemora loron ne’e tanba agora ita iha hela Estadu Emerjénsia no COVID-19”, tenik Kathleen ba Agência Tatoli, via telefónika, sábadu ne’e.

Tanba ne’e, komunidade xineza reprezenta husi ema balun hodi halo rituál bain-bain iha Xina Rate.

“Ita haree Estadu Emerjénsia no pandemia COVID-19, sei laiha sambai no atividade hanesan tinan uluk bainhira komemora loron ne’e, maibé ita-nia maluk komunidade xineza iha Timor-Leste hamutuk ho ha’u no maluk na’in-haat seluk reprezenta sira hodi bá halo sambaia iha Xina Rate Taibessi tanba razaun ita iha situasaun ne’ebé ladún di’ak liga ho Coronavírus, tanba ita presiza prevene”, Kathleen akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here