Sherley Siki, Estudante Mestradu iha Fakuldade Siénsia no Komunikasaun Universidade Atma Jaya Yogyakarta.

Autóra: Sherley Siki

Prezidente Repúblika iha loron 3 fulan-abríl dekreta exonerasaun funsaun husi Vise-Ministra Saúde iha VIII Governu Konstitusionál bazea ba proposta husi Primeiru Ministru. Despasu ida ne’e espalla lalais iha mídia sosiál no mídia online sira hodi hamosu reasaun oin-oin iha loron hanesan, ne’ebé baralla atensaun povu no Governu iha tempu luta kontra pandemia COVID-19.

Iha luta kontra pandemia COVID-19 ne’e, Ministériu Saúde rasik tenke serbisu estra hodi asegura saúde públika. Alende ne’e hodi bele hatene asaun saida maka Nasaun atu foti, prevene COVID-19 iha rai laran, orgaun hotu-hotu, inklui mídia sira hein teb-tebes informasaun husi institusaun relevante sira, liuliu Ministériu Saúde. Durante ne’e, liu husi observasaun iha Mídia Sosiál bele nota katak, populasaun barak maka la dun satisfas ho saida maka Governu halo ona, tanba desde fulan-janeiru to’o marsu 2020, diseminasaun kona-ba medida preventiva sira COVID-19 ladún másimu, ne’ebé ikus mai hamosu protestu oin-oin husi populasaun bainhira Ministériu Saúde atu estabelese fatin kuarentena no isolamentu iha kapitál, Dili.

Alende ne’e, bainhira Timor-Leste iha ona kazu konfirmadu ida ba COVID-19, públiku mos preokupadu ho informasaun la loss ne’ebé espalla, tanba inkonsisténsia informasaun ne’ebé Ministra Interina no Vise Ministra Saúde rasik hasai durante konferénsia imprensa ho mídia sira hamosu reasaun, la’ós de’it husi públiku maibé ho mídia rasik.

Hanesan ezemplu, bainhira Ministra Interina no Vise-Ministra Saúde hala’o konferensia imprensa hodi fó sai rezultadu teste husi kazu suspeitu COVID-19 ba sidadaun nain lima ne’ebé negativu, mosu dez-entendimentu entre Vise-Ministra Saúde ho jornalista sira. Dez-entendimentu  ne’e ikus mai sai preokupasaun ba orgaun soberania sira inklui Parlamentu Nasionál no Xefe Governu rasik.

La hein tan kleur iha semana ida nia laran, Primeiru Ministru hatún despasu hodi nomea portavós ba Sala Situasaun Luta Kontra COVID-19 hodi responde ba povu nia preokupasaun relasiona ho Estadu Emerjénsia, hodi tau ses tia Vise-Ministra nia papel iha assuntu krusiál ne’e.

Liu husi akontesimentu ne’ebé rezulta ezonerasaun Vise-Ministra Saúde, buat balun maka ita bele aprende maka, karik iha situasaun krize nia laran, instituisaun ida presiza halo komunikasaun efetivu ho públiku, no tenke utiliza mídia sira no mós uza instituisaun nia rekursu ne’ebé iha hodi disemina informasaun liuhusi jestu ne’ebé apropriadu.

Risku bo’ot ida bele mosu bainhira rumór espalla no mosu hipótese oin-oin husi liur, liliu bainhira mídia la hetan informasaun ne’ebé faktuál no laiha esplikasaun ne’ebé kredivel husi instituisaun rasik. Iha tempu krize, lider sira presiza proativu hodi utiliza meiu komunikasaun hodi desimina informasaun loloos hodi prevene rumór no espekulasaun iha públiku.

Bainhira mídia la hetan informasaun ne’ebé loos husi instituisaun ida, mídia sei buka opiniaun, ideia kona-ba kauza krize ne’e liuhusi sujestaun husi espesialista sira, polítiku sira, individu no sira seluk ne’ebé bele halai sees, tanba hipótese ne’ebé forma tiha ona husi públiku, Pasquier no Fivat (2012:26). Tan ne’e bainhira iha krize nia laran presiza halo komunikasaun di’ak iha mídia hodi kontribui ba jestaun krize ne’ebé di’ak.

Jane Meier (2011:14) hateten iha krize nia laran presiza komunikasaun ne’ebé bele afeta opiniaun públiku nian. Tan ne’e mídia kaer papel krusiál atu influénsia opiniaun públiku. Mídia sei forma komunidade nia hanoin, lalaok no sentidu kona-ba instituisaun nia reputasaun. Iha situasaun krize nia laran sempre iha mídia, oferese opsaun rua, primeiru mídia sei ajuda ka tuir faii mídia bele hakanek ema ka instiutisaun nia naran. Mídia hala’o sira nia funsaun no responsabilidade hodi serbí públiku liuhusi notísia ne’ebé loos.

Iha prátika mundu jornalismu nian, motivazaun bázika husi jornalista sira iha krize nia laran maka atu hatene isu ne’e nia hun, no buka tuir saida maka akontese loloos, no sé maka responzabiliza hodi sira bele fó kulpa ba. Tan ne’e, bainhira mosu krize labele haree mídia hanesan inimigu no tenke foku hodi haburas relasaun di’ak entre instituisaun ho mídia.

Jane Meier mós hatutan, hili portavós iha krize nia laran sai parte ne’ebé importante no krítiku teb-tebes. Maibé regra ne’ebé portavós presiza haree mak kredibilidade, onestidade no komunikasaun intensiva ne’ebé bele atrai komunidade (tantu iha mídia sosiál no seluk sira), kumpri valór no prinsípiu organizasaun, no tenke demonstra simpatia ba sira ne’ebé afetadu durante krize nia laran. Alende portavós presiza mós funsionáriu ho koñesimentu másimu ne’ebé bele hamrik iha liña oin hodi bele ajuda portavós atu komunika ho mídia sira.

Ikus liu, Combs no Holladay iha Meier  (2011:14) hateten asuntu ida ne’ebé tenke haree didiak iha krize nia laran maka husu diskulpa ou admite sala ruma ne’ebé halo ona.

Dala barak, ema barak maka hanoin katak ho husu diskulpa sei hatodan tan instituisaun no sei lori problema barak liután duranta krize nian laran. Maibé tuir loloos, asume responsabilidade no la fó sala ema seluk iha krize nian laran sei sai estratejia ne’ebé di’ak hodi salva institusaun nia reputasaun. Sei iha sala ruma ne’ebé fó impaktu ki’ik bele oferese kompensasaun ka hatudu espresaun simpatia ba vítima. Maibé se karaik krize nee iha impaktu bo’ot, no jestór sira hatene no rekoñese sira nia sala, presiza hato’o diskulpa.

Kazu Ministériu Saúde ne’ebé hamosu dez-entendimentu ho jornalista sira tenke sai mós referénsia di’ak ba instituisaun sira seluk hodi haree didiak sira nia jestaun komunikasaun, liuliu iha tempu krize nia laran. Tanba jestaun komunikasaun di’ak iha instituisaun ida nia laran bele kontribui hodi fó solusaun ba krize ne’ebé mosu.

Referensia:
Meier, Jane-Jordan. 2011. The Four Stages of Highly Effective Crisis Managemen : How to Manage the Mídia in the Digital Age.New York: CRC Press

Hakerek nain, Communication Practicioner no Estudante Mestradu iha Fakuldade Siénsia no Komunikasaun Universidade Atma Jaya Yogyakarta.

1 KOMENTÁRIU

  1. Artigu kapas, pelumenus fo hanoin ba publiku kona-ba komunikasaun ho efetivu bazeia teoria sira ne’ebe iha.

HAKEREK NO HATÁN

Please enter your comment!
Please enter your name here