Pasajeiru Aviaun Citilink bainhira to’o iha Aeroportu Prezidente Nicolau Lobato, Comoro, Dili. Imajen Tatoli/António Gonçalves

DILI, 04 abríl 2020 (TATOLI) – Maski Prezidente Repúblika, Francisco Guterres ‘Lú Olo’ dekreta ona Estadu Emerjénsia iha loron sesta (27/03), maibé Aeroportu Internasionál Prezidente Nicolau Lobato, Comoro, nafatin loke maibé fó limitasaun ba voo hodi fasilita timor-oan sira ne’ebé hakarak fila mai Timór relasiona ho pandemia COVID-19.

Desizaun husi Governu ne’e hamosu pro no kontra, haree ba moras ne’ebé perigozu tebes tanba halakon ona ema-barak nia moris iha nasaun barak, tanba ne’e Governu liuhosi Autoridade Aviasaun foti ona desizaun.

Prezidente Konsellu Administrasaun Autoridade  Navegasaun Aéreu Timor-Leste (ANATL), Romualdo da Silva, informa hahú loron sábadu (04/04) sei laiha tan operasaun komersiál internasionál husi nasaun li’ur tanba horisehik Ministériu Transporte no Komunikasaun (MTK) liuhosi Autoridade Aviasaun Sivíl Timor-Leste (AACTL) suspende provizóriu voo internasionál.

“Aviaun Komersiál komesa ohin ba oin taka ona, hodi hein tuir mai aban bain-rua karik fó ona autorizasaun maka foin loke filafali operasaionál hanesan bain-bain”, dehan Prezidente ANATL hafoin akompaña portugés sira fila bá sira-nian rai iha Aeroportu Comoro, sábadu ne’e.

Nia adianta, hanesan saida maka horisehik desizaun Governu ba aviaun komersiál atu taka ona maibé kuandu ba kestaun emerjénsia ruma, nu’udar autoridade navegasaun aéreu kontinua loke.

“Maske ita-nian Governu deside ona taka aeroportu provizoriamente ba operasaun aviaun komersiál nian, maibé kona-ba kestaun nesesidade emerjénsia nian hanesan lori ai-moruk husi li’ur mai no asuntu emerjénsia seluk hanesan evekua ita-nian sidadaun iha rai-li’ur mai iha rai-laran, ANATL sei loke aeroportu, nune’e bele responde ba kestaun nesesáriu”, afirma Romualdo.

Iha fatin hanesan, Prezidente AACTL, Eusébio Freitas, realsa horikalan AACTL hasai ona notifiksaun ba operadór aviaun komersiál sira, katak hahú ohin aviaun komesiál sira temporáriamente supende lai hodi haree progresu ba situasaun pandemia COVID-19 la’o oinsá maka Autoridade Aviasaun sei informa filafali ba operadór sira.

“Hahú ohin ba aviaun komesiál sira sei la tama mai ita-nian aeroportu, eseptu ba kazu tratamentu espesiál hanesan kazu emerjénsia ruma maka aeroportu bele loke maibé komersiál efetivu ohin la mai tan ona tanba Governu supende provizóriu”, nia realsa.

Ministru Transporte no Komunikasaun, José Agostinho da Silva, hateten ligasaun transporte  aéreu suspende ona, tanba ne’e atendimentu komersiál ba pasajeiru sira laiha ona.

“Suspensaun temporária estraordinária ba pontu entrada sira hanesan aeroportu ba aviaun komersiál sira hahú sábadu (04/04) aviaun sei la mai tan atu prevene pandemia COVID-19”, dehan governante ba Agência Tatoli iha ninia gabinete, Caicoli.

Haktuir iha karta ofisiál husi AACTL ba operadór aviaun sira iha sesta (03/04) katak, sei suspende  temporáriu operasaun komersiál internasionál (designated and charter) ba aviaun ne’ebé halo operasaun mai Timor-Leste ho rute Denpasar-Dili-Denpasar, Kupang-Dili-Kupang, Darwin-Dili-Darwin no Singapura-Dili-Singapura.

Desizaun ne’e sei efektivu hahú sábadu 4 abríl 2020.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here