Funsionáriu SLN halo limpeza iha armazén 03 Tibar hodi hamoos saku foos ne’ebé fo’er. Imajen/SLN.

DILI, 04 abríl 2020 (TATOLI)-Daudaun ne’e, foos tonelada 376 mak asegura iha armazén Estadu nian hodi responde ba situasaun emerjénsia-sira. Maibé, nasaun sira, hanesan Tailándia ho  Vietname hapara ona atu hatama foos  mai Timor-Leste.

Notísia Relevante : Estoke Ai-han ba Fulan Tolu Sufisiente

Prezidente Konsellu Administrasaun Sentru Lojístika Nasionál, Agosto Junior Trindade. Imajen/Egas Critovão

“Ami hakarak hato’o ba públiku katak foos importasaun la mai ona Timor tanba propagasaun pandemia Coronavirus ka COVID-19. Entaun, ita iha foos rai hamutuk tonelada 376 mak iha armazén,” hateten  Prezidente Konsellu Administrasaun Sentru Lojístika Nasionál, Agosto Junior Trindade, ohin,  ba jornalista sira iha Sentru Konvensaun Dili (CCD).

Liuhosi enkontru interministeriál, ohin, iha CCD, hamutuk ho Ekipa ba Estudu no Analiza Risku, forma ona ekipa task force atu haree kestaun alimentár iha Timor-Leste durante ámbitu luta kontra propagasaun pandemia COVID-19.

Nia hatutan, governu tenke garante katak ema la bele hamlaha mézmu COVID-19 ne’e too iha Timor no buat hotu bele taka mais governu buka nafatin dalan para bele asegura alimentár ba povu iha rai-laran.

“Ita-nia konsumu nasionál ba fulan ida ne’e hamutuk tonelada 11.142 bazeia ba dadus estatístika ne’ebé iha,” hateten Agosto Junior Trindade.

Diretóra Jerál MAP, Maria Odete do Ceu Guterres. Imajen/Egas Cristovão

Iha fatin hanesan Diretora Jerál Agrikultura, Maria Odete do Ceu Guterres, esklarese,  papél MAP nian atu responsabiliza ba produsaun ai-han no saida mak MAP atu haree ba ai-han sira ne’ebé agrikultór-sira prodús iha natar hanesan hare no iha kintál-laran hanesan batar  atu bele akumula ka halibur hodi garante ai-han nasionál.

MAP agora nafatin iha posibilidade saida atu haree fali ba iha segunda époka,  entaun MAP halo ona kálkulu ida ba hare iha époka daruak bele atinje 50% tanba udan-been menus.

“Ami mós halo ona proposta ida atu obriga ita nia agrikultura-sira atu kuda tan ai-han seluk ho eskala boot. Hanesan, kuda ai-fariña, fehuk, talas no seluk tan. Ida nee mak papél MAP nian iha futuru,” hateten Maria do Ceu Guterres.

Jornalista : Felicifade Ximenes

Editór       : Francisco Simões

 

HAKEREK NO HATÁN

Please enter your comment!
Please enter your name here