Koordenadór ba Ekipa Estudu no Análize Risku, Francisco da Costa Guterres. Imajen/Tatoli

DILI, 04 abríl 2020 (TATOLI)-Estoke ai-han ba povu Timor-Leste iha fulan tolu nia-laran, sufisiente hela. Maibé, fulan tolu oin-mai, governu tenke hanoin prepara-tan ona.

Koordenadór ba Ekipa Estudu no Analiza Risku, Francisco da Costa Guterres, hateten, alimentár tenke preparadu ba populasaun tomak hodi la bele enfrenta krize ai-han bainhira situasaun pandemia Coronavirus ka COVID-19 ne’e mosu iha Timor-Leste ho durasaun tempu ne’ebé naruk.

Liuhosi reuniaun interministeriál, ohin, iha Sentru Konvensaun Dili (CCD), Ekipa ba Estudu no Analiza Risku, aprezenta preokupasaun, oinsá mak Ministériu Agrikultura, Ministériu Turizmu Komérsiu no Indústria (MTCI), liuliu Sentru Lojístika Nasional atu haree ona kona-ba situasaun alimentár iha Timor-Leste.

Eis Sekretáriu Estadu Seguransa ne’e hateten, governu tenke  prepara ai-han no mós fó seguransa ai-han ba populasaun tomak para sira bele la enfrenta situasaun propagasaun pandemia COVID-19 iha tempu naruk tuir mai.

Francisco da Costa Guterres, atuál  asesór ba Gabinete Primeiru-Ministru (PM) hateten, dadus hosi Sentru Lojístika Nasionál, Ministériu Agrikultura no Ministériu Turizmu Komérsiu no Indústria hatudu katak estoke a-han ba fulan tolu ne’e sei natoon, maibé durante fulan tolu ba oin ne’e tenke diskute ona kona-ba mekanizmu oinsá atu aumenta tan ba estoke-sira, atu nune’e, povu Timor-Leste bele aguenta nafatin to’o COVID-19 ne’e remata ka hotu.

“Depois iha reuniaun ne’e mós ami sita kona-ba oinsá atu hadi’a ka revee fila-fali kestaun transportasaun kona-ba hahán. Ezemplu, hahán hosi foho mai sidade hanesan entre munisípiu para ita kontinua normaliza nafatin merkadu lokál para kontinua a-baste ba ita-nia populasaun tomak,” esplika  Francisco da Costa Guterres.

Tuir sira-nia haree, agora daudaun Timor-Leste iha problema uitoan tanba estadu emerjénsia entaun vendedór barak mak paradu sira-nia atividade negósiu. Nune’e fó kestaun uitoan ba populasaun nia preparasaun ai-han no provoka presu bele sa’e uitoan iha merkadu nasionál to’o merkadu lokál.

“Ami mós iha planu ida atu apoiu nesesidade bázika gratuita ba komunidade bainhira situasaun emerjénsia, maibé ami sei diskute hela too agora seidauk foti desizaun,” informa Francisco da Costa Guterres.

Jornalista : Felicidade Ximenes

Editór       : Francisco Simões

HAKEREK NO HATÁN

Please enter your comment!
Please enter your name here