Koordenadór Estadu Maiór Konjuntu COVID-19, Kapitaun Mar no Guerra, Donaciano da Costa Gomes. Imajen Tatoli/Egas Cristovão

DILI, 03 abríl 2020 (TATOLI) – Maski Prezidente Repúblika (PR), Francisco Guterres ‘Lú Olo’ dekreta ona Estadu Emerjénsia relasiona ho COVID-19 iha sesta (27/03) no Governu rasik prepara ona medida prevensaun, maibé atividade balun sei la’o ho normál, nune’e mós komunidade sei movimentu ba mai iha estrada públiku.

Koordenadór Estadu Maiór Konjuntu COVID-19,  Kapitaun Mar no Guerra, Donaciano da Costa Gomes, observa durante ne’e sidadaun sira halo movimentu barak iha Dili, liuliu asesu ba fatin hanesan merkadu, movimentu ba estrada públiku, no atividade sosiál sira seluk.

Aktu hirak ne’e, tuir nia hatudu sidadaun sira komesa la kumpre Dekretu Governu númeru 3/2020 loron 28 marsu, kona-ba medida ezekusaun ba deklarasaun Estadu Emerjénsia ne’ebé dekreta hosi Prezidente Repúblika.

“Hakarak fó avizu ba públiku katak movimentu sira ne’ebé iha estrada, asesu sidadaun sira ba loja, atividade sosiál no kultura iha komunidade nia leet, tenke kumpre nafatin medida preventiva ne’ebé hatuur ona iha lei no labele kontra ita-nia forsa tarefa seguransa sira ne’ebé mak oras ne’e daudaun ezekuta hela orden iha terrenu, tanba sira sei firme nafatin no sei atua kualkér momentu bainhira sidadaun sira la kumpre regra ne’ebé Estadu hatuur tiha ona”, tenik Koordenadór Estadu Maiór Konjuntu COVID-19, liuhosi konferénsia imprensa iha Salaun Sentru Mídia COVID-19, ne’ebé hala’o iha Sentru Konvensaun Dili (CCD, sigla portugés), sesta ne’e.

Nia hato’o lia hirak ne’e, tanba durante ne’e iha bairru balun, komunidade sira sei kontinua la’o ba mai hodi vizita malu no joven sira sei halibur malu.

Tanba ne’e, nia konsidera bainhira situasaun sira ne’e kontinua akontese maka defísil tebes atu halo aplika medida prevensaun ba distánsia sosiál ka hambrik fó espasu metru ida entre ema ho ema.

Nune’e, Koordenadór Estadu Maiór Konjuntu COVID-9 apela ba populasaun hotu atu mantein kalma no hamutuk hodi kombate COVID-19 iha Timor-Leste.

“Situasaun ida-ne’e sai preokupasaun ba ema hotu tanba COVID-19 hanesan amesa invizível. Tanba ne’e, sidadaun hotu tenke manán konsiénsia katak bainhira to’o tempu sé de’it bele hetan kontaminasaun. Estadu hasai medida prevensaun tanba Estadu mós iha obrigasaun atu koloka sistema seguransa atubele haree oinsá maka medida sira ne’e implementa husi populasaun sira rasik. Bainhira ema ruma halo nafatin atividade sira ne’ebé kontra medida maka sei iha solusaun rua maka Estadu intensifika forma oinsá bele atua no bainhira nia la kontribui kombate vírus ne’ebé afeta mundu maka bele afeta ba timor-oan hotu”, nia salienta.

Medida ne’e atu aplika meiu sistema seguransa atubele haree bebeik oinsá maka sidadaun bele tau iha prátika no evolui konsuante tuir dadus ne’ebé iha.

“Felizmente Timór sei iha kontaminasaun ida de’it. Maibé ami hein katak sidadaun hotu iha responsabilidade ba sistema ne’ebé mak monta ona atu sidadaun sira rasik voluntariamente bele kontribui, tanba só nune’e maka ita hotu bele manán konsiénsia atu funu hasoru COVID-19”, nia subliña.

Tuir kapitaun ne’e, durante Estadu Emerjénsia, medida hotu ne’ebé hasai ba benefísiu ema-nian no direitu ema-nian, maski tenke limita buat balun.

“Iha Estadu Emerjénsia, Estadu iha direitu balun ne’ebé tenke retira atubele halo buat di’ak ne’ebé maka di’ak ba ema barak. Ita sei iha faze inisiál, maibé tuir dadus ne’ebé mak ekipa téknika Ministériu Saúde aprezenta iha evolusaun drástika, maka medida mós sei muda. Tanba ne’e, ha’u apela ba sidadaun hotu tenke iha responsabilidade ba medida ne’ebé Estadu halo, tanba di’ak ba ema hotu”, nia dehan tan.

Entretantu, medida ne’ebé mak Governu prevee maka hanesan tenke fase liman bebeik ho sabaun, tenke uza máskara, tenke hambrik ho distánsia metru ida hosi ema ba ema, labele halo movimentu iha estrada públiku, no seluk-tán.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here