Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 04 abríl 2020 (TATOLI) – Koordenadór Ofisiál Ligasaun Forsa Tarefa COVID-19, Rui Maria de Araújo relata ema ne’ebé pozitivu surtu COVID-19 presiza loron 30 to’o 40 hodi rekopera totál.

Maske nune’e, médiku sira sei halo teste laboratóriu hodi prova loloos katak negativu ona maka foin bele deklara loloos katak ema ne’e rekopera totál.

“Tuir evidénsia husi rai sira seluk, peskiza ne’ebé World Health Organization (WHO) no mós matenek na’in sira halo, ho esperiénsia sira ho pasiente sira iha Xina, katak pasiente sira iha fatin seluk kuantidade vírus ne’ebé iha ita-nia kakorok ne’e lakon ne’e lori tempu husi loron 14 liu fulan ida”, hateten Koordenadór liuhosi Sentru Mídia COVID-19 iha Sentru Konvensaun Dili (CCD, sigla portugés), sábadu ne’e.

Portavós kombate COVID-19 iha Timor-Leste ne’e esplika liután, iha fatin balun ne’ebé sira halo ona esperiénsia atu uza ai-moruk balun kona-ba virus ninian, dala balun viral load lakon lalais, maibé iha fatin balun liuliu ba kazu sira ne’ebé la’ós grave hanesan kazu iha Timor-Leste, normalmente la fó ai-moruk barak.

“Kazu ita-nian ne’e, ita la halo tratamentu anti viral, maibé ita husik ema ne’e ninia imunidade maka kombate rasik vírus ne’e no husi loron 21 marsu foin lalais deklara katak nia pozivu mai to’o agora besik semana tolu, entaun nia sei tama iha periodu loron 30 ba 40. Hein katak loron balun tan halo fali ezame laboratóriu no bele hetan katak nia negativu ona”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here