Administradór Postu Administrativu Dom Aleixo, Tomas Barros. Imajén/Osória Marques

DILI, 04 abril 2020 (TATOLI)–Administradór Postu Administrativu Dom Aleixo, Tomas Barros informa, nu’udar autoridade munisipál hanesan administradór sei serbisu hamutuk ho Falintil-Forsa Defeza Timor-Leste (F-FDTL) no Polísia Nasionál Timor-Leste (PNTL) hodi kontrola populasaun sira-nia movimentu iha estadu emerjénsia ida ne’e.

Nia hatutan, ba asuntu ida ne’e nia parte sei serbisu hamutuk xefe suku no xefe aldeia sira iha Postu Administrativu Dom Aleixo nian atu kontrola másimu populasaun sira-nia movimentasaun hodi labele viola regra estadu emerjénsia ne’ebé Governu fó sai.

“Ha’u kontinua anúnsia ba ha’u-nia komunidade sira atu redús movimentu. Ha’u orienta autoridade lokál sira hanesan xefe suku no xefe aldeia sira atu fó anúnsiu ba komunidade maibé komunidade mak seidauk iha konsiénsia hodi kumpri regra Estadu Emerjénsia nian. Katak, ema ho transporte labele halo movimentu no tenke hakmatek iha ida-idak nia uma, eseptu nesesidade merkadu no loza mak bele la’o sai,” dehan Administradór Postu Administrativu Dom Aleixo, Tomas Barros, ba Ajénsia TATOLI liuhosi telefone, sábadu ne’e.

Nia hateten, bainhira autoridade lokál sira fó sai avizu ba komunidade sira mak la rona no kontinua nafatin halo grupu no laiha distánsia sosiál mak autoridade munisipál hanesan administradór sei foti desizaun hodi entrega ba F-FDTL no PNTL atu atua.

“Ha’u dehan hela de’it ba ha’u-nia xefe suku no xefe aldeia sira atu alarma ba komunidade sira liuliu komunidade iha Postu Administrativu Dom Aleixo nian. Bainhira komunidade mak la rona, ami sei telefone ba seguransa PNTL-F-FDTL hodi bele rezolve komunidade ne’ebé mak halo grupu iha bairru ka dalan públiku, no oinsá mak bele atua ne’e só seguransa,” nia dehan.

Administradór ne’e hateten, bele tuur iha bairru ka iha uma ho grupu maibé labele grupu boot liu nune’e hada’et moras at (COVID-19) ne’e ba malu. Maibé, nia dehan, tenke kumpre regra Estadu Emerjénsia nian katak tenke kria distánsia sosiál, uza máskara, no tenke fase liman beibeik.

“Ha’u sempre pasa mensajén ba ita-nia autoridade lokál sira no sira mós informa tutan ba komunidade. Tanba ha’u hatene katak moras at ne’e perigozu no fasil da’et ba ema ida ho ema seluk no mós hamate ema barak ona iha mundu. Nune’e, ha’u husu ba komunidade sira-nia kompreensaun hodi kumpre regra Estadu Emerjénsia nian ne’ebé envigór iha ita-nia rai doben Timor-Leste,” nia sujere.

Nia informa, Postu Administrativu Dom Aleixo, Munisípiu Dili, hamatan ba Suku Bairru Pité, Madohi, Comoro, Fatuhada Bebonuk, Manleuana, no Suku Kampung Alor ne’ebé ho aldeia másimu hamutuk 71.

Notísia Relevante: Lere Husu Autoridade Lokál Sira Kontrola Povu Redús Movimentu

Jornalista : Osória Marques

Editor       : Cancio Ximenes

HAKEREK NO HATÁN

Please enter your comment!
Please enter your name here