Diretóra Jerál Prestasaun Saúde, Odete Viegas da Silva.Imajen /TATOLI.

DILI, 03 abríl 2020 (TATOLI)-Diretóra Jerál Prestasaun Saúde, Odete Viegas da Silva relata, númeru suspeitu ba pandemia COVID-19 to’o loron sesta (03/04/2020) aumenta ba ema na’in 42.

Maibé hosi dadus ne’e COVID-19 pozitivu mantein ema na’in ida, ema na’in 32 negativu hafoin teste raan iha laboratóriu nasionál no na’in sia seluk sei hein hela rezultadu teste.

Entretantu, Governu liuhosi Sentru Integradu Gestaun Krize (CIGC-sigla portugés) to’o kinta (02/04/2020) meudia relata  kazu  suspeitu COVID-19 hamutuk 35, na’in ida maka pozitivu ne’ebé fó sai iha loron 21 fulan-marsu , na’in 24 negativu, no na’in 10 maka hein hela rezultadu analiza.

Baseia ba dadus ne’ebé asesu hosi Saúde Munisípiu sira katak to’o loron 04 fulan-abríl 2020 ne’e abitante na’in 194 maka hela obrigatóriu iha fatin kuarentena iha Munisípiu Covalima no fatin seluk tan. No okupante kuarentena sira  iha Dili 764.

“Ami atu hatete mós katak pasa ona ba loron 14 periudu okupasaun iha Dili mantein nafatin ho númeru 330, iha munisípiu aumenta nain haat, totál kazu ne’ebé mak liu ona hosi periudu okupasaun totál hamutuk 341, totál kuarentena obrigatóriu ohin loron aumenta 61 totál 1096 suspeitu ba loron ohin hamutuk 42,” nia dehan ba Jornalista sira iha Sentru Konvensaun Dili, sesta (03/04/2020).

Diretóra Jerál ba Prestasaun Saúde ne’e husu ba populasaun para mantein hakmatek iha uma no kumpre regulamentu sira durante estadu emerjénsia liliu tulun médiku sira hodi prevene surtu coronavirus atu labele kontinua da’et ba ema seluk.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here