Ministru Defeza no Seguransa no Ministru Interiór interinu, Filomeno da Paixão de Jesus. Imajen Tatoli/Egas Cristovão

DILI, 03 abríl 2020 (TATOLI) – Ministru Defeza no Seguransa no Ministru Interiór interinu, Filomeno da Paixão de Jesus, informa katak nia parte hatún ona diretiva ba Polísia Nasionál Timor-Leste (PNTL) ho baze ba Dekretu Governu atu halo desaminasaun iha Fronteira Terrestre atu hahú semana oin bele loke de’it iha loron kuarta.

“Fronteira Terrestre ne’e hahú semana oin, kada semana loke dala-ida iha de’it loron kuarta no oras rua de’it. Ne’ebé ohin no aban ne’e sei loke atu sira tama tanba PNTL tenke halo ezaminasaun, maski sira simu tiha ona orden,” tenik Ministru Filomeno iha Palásiu Governu, hafoin enkontru ho Primeiru-Ministru, Taur Matan Ruak, sesta ne’e.

Ministru haktuir, objetivu atu hasoru Xefe Governu atu simu orientasaun hodi asegura entrada terrestre ka rai-maran ne’ebé sidadaun sira kontinua tama no balun liu dalan ilegál.

“Ita haree sidadaun sira mai ita atu halo nusa, ita atu rejeita ka haruka fila ka ita atu simu, entaun sira timor-oan no tuir ita-nia konstituisaun no lei sira ne’e ita labele duni sira, maibé ita tenke simu sira no kanaliza sira mai iha kuarentena”, nia akresenta.

Ho nune’e, governante ne’e adianta dalan di’ak liu presiza haree kapasidade absorvasaun kuarentena iha Timor-Leste atu simu hira atu fó lisensa ba sidadaun sira bele tama mai.

“Agora timor-oan sira tama mai ita la kontrola no tama mai ita lori ba iha ne’ebé, se ida-idak ba nia uma mak nia tuir kuarentena ne’e di’ak, maibé la tuir ne’e problema”, nia afirma.

Tanba ne’e, nia dehan esforsu ne’e la’ós Ministériu liuhosi PNTL no FALINTIL-Forsa Defeza Timor-Leste (F-FDTL), maibé tenke koopera hamutuk ho Ministériu Negósiu Estanjeiru no Kooperasaun (MNEK), Ministériu Eduaksaun no Juvenrtude (MEJD), Ministériu Saúde (MS) no ministériu relevante sira atu hamutuk kontrola sidadaun ne’ebé tama ilegál mai territóriu nasionál.

“Ezemplu semana ida ne’e, iha fatin ida presiza ema atu tama hira, entaun ita fó tama labele tama sabraut ne’e ita hotu lakon kontrolu ne’ebé ikus mai balun bá uma no derepente COVID-19 kona ne’e afeta ba ema hotu”, nia sujere.

Aleide ne’e, Ministru Filomeno mós simu orietasaun husi Primeiru-Ministru atu fó orienta seguransa no defeza hodi kumpre Dekretu Governu nian, liuliu ba movimentasaun ema-nian.

Kona-ba preokupasaun fasilidade médiku ba parte seguransa no defeza, tuir ministru ekipamentu protesaun iha hotu pakote ne’ebé Governu propoin iha Parlamentu Nasionál no aprova ona, ne’ebé ministériu relevante halo ona kontaktu atu sosa.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here