Ministru Obra Públika, Salavador Eugênio Soares dos Reis Pires asina nota entendimentu ho operadór telekomunikasaun tolu. Imajen Tatoli/Florencio Miranda Ximenes

DILI, 03 abríl 2020 (TATOLI) – Ministériu Obra Públika (MOP) asina ona nota entendimentu ho Operadór Timor Telecom, Telemor no Telkomcel atu fasilita subsídiu eletrisidade ho $15  ba kliente hamutuk 160.555 liuhosi manda mensajen ba númeru únika ka hotline 12150.

Ministru Obra Públika, Salavadór Eugênio Soares dos Reis Pires dehan hahú segunda (06/04) númeru hotline 12150 funsiona efetivu iha operadór telekomunikasaun tolu atu simu mensajen husi kliente nia númeru kontadór atu manda otomatika token ba subsídiu pre-pagu eletrisidade $15.

“Funsionamentu ne’e, ita-nia kliente sira iha uma no mensajen de’it husi númeru hotline 12150 hodi manda númeru kontadór ba hotline ne’e no automatikamente númeru ne’e fó fali mensajen ida ho token ka númeru pulsa ka pre-pagu $15 atu kliente sira enxe iha uma de’it”, tenik Ministru Salavador hafoin asina nota entendimentu ho reprezentante telekomunikasaun tolu ne’e iha edifísiu Eletricidade de Timor-Leste (EDTL), Caicoli, sesta ne’e.

Maneira atu asesu token pulsa EDTL. Imajen/Espesiál

Hotline 12150 oferese husi Autoridade Nasionál Komunikasaun (ANC, sigla portugés) atu kada kliente bele haruka mensajen (SMS) ba númeru hotline refere no númeru kontadór, autamatikamente operador sira ne’e sei haruka token ekivalente $15 diretamente ba kada kliente nia telemóvel atu enxe iha uma.

Ho nune’e, Governante ne’e dehan token ka subsídiu pre-pagu eletrisidade ne’e, EDTL entrega ona ba operadór telekomunikasaun ho totál kliente 160.555 no sei hetan $15.

“Númeru hotline 12150 ne’e iha segunda, foin efetivu atu ita-nia komunidade ka kliente sira bele halo ona mensajen númeru kontadór pre-pagu ba númeru hotline ne’e automatikamente pulsa $15 hodi transfere ba sira nia mensajen iha telemóvel hafoin kliente sira bele enxe ba kontadór”, nia akresenta.

Nia refere liúta, atu garante tranferénsia token ka subsídiu pre-pagu ne’e sei autoriza ba konsumidór sira atu tenta númeru telemovél husi operadór oin-oin hodi mensajen ba hotline ne’e.

“Ami sei fó pre-pagu ka token dala-ida de’it ba kontadór ida katak enxe dala-ida de’it no sei la enxe tan, maski uza númeru telemóvel la hanesan tanba sistema token ne’e rejistu hotu iha operadór telekomunikasaun tolu ne’e,” nia adianta

Ho nune’e, Ministru Salvador fó agradesimentu ba operadór telekomunikasaun tolu no ba kompañia sira, inklui tékniku EDTL hotu ne’ebé fuan boot apoia Governu iha situasaun emerjénsia.

Polítika Governu fó subsidíu ne’e ho baze ba Dekretu Governu ba medida ezekusaun Estadu Emerjénsia iha ártigu 26, atu prevene konsumidór sira ka populasaun sira atu labele halo movimentu no halibur malu iha fatin ida hodi hola pre-pagu eletrisidade atu prevene-an husi COVID-19.

Reprezentante operadór telekomunikasaun Telecomcel, Samatha Abel dehan téknikamente operadór telekomunikasaun tolu sei halo transfénsia subsídiu pre-pagu eletrisidade ba kliente hamutuk 160.555 iha territóriu Timor-Leste tomak.

“Token ka subsídiu pre-pagu eletrisidade ho kada kliente simu $15 ne’e husi Governu ka EDTL hotu atu operadór telekomunikasaun liuliu Telcomcel só mantein koneksaun atu nune’e mensajen kliente sira ne’ebé tama sistema hodi nune’e fó fila fali tuir númeru kontadór”, nia dehan tan.

Kona-ba kestaun ne’e, nia reforsa téknikamente operadór telekomunikasaun sira halo ona teste no pronto ona hodi hein segunda loke efetiva atu simu mensajen no manda token ba kliente sira ho montante $15.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here