Diretór Ezekutivu Servisu Autónomu Medikamentus Ekipamentus Saúde (SAMES), Santana Martins.Imajen/TATOLI:Felicidade Ximenes

DILI, 03 abríl 2020 (TATOLI)-Servisu Autónomu Medikamentu no Ekipamentu Saúde (SAMES) daudaun ne’e iha estoke pakote ekipamentu ba prevensaun pandemia globál COVID-19 hamutuk 494.

Diretór Ezekutivu SAMES, Santana Martins informa estoke ne’e la garante atu instituisaun SAMES hodi responde pedidu hosi instituisaun hotu-hotu tanba ne’e Governu presiza aselera prosesu hodi sosa tan ekipamentu ba protesaun no ai-moruk COVID-19 hodi responde nesesidade urjente bainhira númeru kazu COVID-19 aumenta iha rai-laran.

Notísia Relevante : Estoke Ekipamentu Prevene COVID-19 Menus

Ekipamentu ne’ebé oras ne’e iha SAMES, antes ne’e apoiu ona hosi Organizasaun Mundiál Saúde (OMS) ba Governu Timor-Leste liuhosi Ministériu Saúde (MS).

“Ekipamentus sira ne’e mak hanesan roupa protesaun, maskra, luvás, oklu no sapeo ho botas,’’hateten Diretór Ezekutivu SAMES, Santana Martins ba Agência TATOLI, iha ninia servisu fatin, Kampung-Alor, Dili sesta (03/04/2020).

Notísia Relevante : Governu Planeia Sosa Ekipamentu COVID-19

Hodi hatutan tan, SAMES antes ne’e distribui ona ekipamentu protesaun COVID-19 ba Servisu Nasionál Ambulansia, Ospitál Nasionál Guido Valadares (HNGV-sigla portugés), Ospitál Referál Oé-Cuse, Ospitál Rejionál Baucau, Maliana, ospitál Referál Maubise, Covalima no seluk tan.

Tuir dadus ne’ebé mak iha distribuisaun ekipamentu COVID-19 nian ba instituisaun sira mak dahuluk SAMES distribui ba Servisu Nasionál Ambulansia tanba sira mak iha liña dahuluk nian hodi mobiliza pasiente sira husi fatin moras ba ospitál sira,’’ tenik Diretór Ezekutivu SAMES.

Tuir planu iha findesemana ne’e ekipa SAMES sei distribui ekipamentu protesaun ba servisu saúde iha Fronteira Terrestre Motain, Munisípiu Bobonaro, Portu Dili, Aeroportu no fatin seluk tan.

Entretantu, Governu liuhosi reuniaun Konsellu Ministru aprova ona orsamentu Millaun $ 14 hodi sosa ekipamentu no ai-moruk COVID-19. Programa Nasaun Unida ba Dezenvolvimentu (UNDP-sigla Inglés) maka sei tulun governu hodi sosa ekipamentu hirak ne’e iha tempu badak.

Iha parte seluk SAMES, mós iha ona limitasaun ba ai-moruk dis-infetadu maibé instituisaun ne’e koko atu halo fila-fali reprodusaun ba produtu seluk atu prodúz ba ai-moruk dis-infetadu.

“Se karik ita halo distribuisaun direta ba produtu ne’ebé mak iha susar tebes tanba estoke ne’ebé mak limitadu tebes entaun ho asaun ne’ebé iha ita halo fali reprodusaun hanesan kahur ho aimoruk sira ne’e ho bee normál para bele to’o tuir nia persentajen ne’ebé mak iha hodi ita bele uza,’’ esplika Diretór SAMES.

Produtu dis-infetadu ne’e uza hodi hamoos odamatan, kadeira, meza, eskritóriu no seluk tan.

“Daruak mak ita ko’alia kona-ba antiseptika mak hanesan produtu ida hanesan aimoruk atu utiliza ba hamoos liman ka hamoos ba isin ne’ebé mak iha kontaminasaun ruma ,’’tenik tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here