Ekipa Gabinete Jestaun Krize hala’o reuniaun iha Sentru Konvensaun Dili. Imajen Tatoli/Egas Cristovão

DILI, 03 abríl 2020 (TATOLI) – Primeiru-Ministru, Taur Matan Ruak liuhosi despaisu númeru 018/PM/IV/2020, hodi nomeia portavós ba Sala Situasaun Sentru Integradu ba Jestaun Krize (CIGC, sigla portugés) ba luta kontra COVID-19.

Despaisu númeru 018/PM/IV/2020, ho nomeasaun portavós sira ne’e konside iha pápél fundamentu atu disemina informasaun konkreta no atuál ne’ebé iha hodi  prevene no kombate surtu COVID-19.

Aleinde ne’e, portavós ne’e konsidera iha importánsia asegura ba unifórme no koerénsia ba informasaun ofisiál ne’ebé disemina kona-ba prevensaun no kontrolu surtu COVID-19 iha Timor-Leste.

Notísia Relevante: PM Taur Formaliza Ona Sala Jestaun Krize no Estrutura ba Luta Kontra COVID-19

“Konsideradu sala situasaun, liuliu iha Estadu Maió Konjutu no koordenasaun ofisiál sira ba ligasaun forsa tarefa, ba funsaun koordenasaun ne’ebé presentemente ezerse no sentraliza iha  konjuntu amplu informasaun kona ba-atividade dezevolvida ba konjutu órgaun sira ne’ebé servisu iha administrasaun públika hodiempeña tarefa ba prevensaun no kontrolu ba surtu COVID-19 iha Timor-Leste”, refere nota imprensa ne’ebé Agência Tatoli asesu iha Portál Ezekutivu, sesta ne’e.

Ho nune’e, númeru 1 artigu 38, lei númeru 2/2010, 21 fulan-abríl, iha aliña I), númeru 2 no númeru 3, artigu 6 iha dekretu-lei númeru 14/2018 , 17 fulan-agostu, determina katak, informasaun ofisiál relativa ba prevensaun no kontrola surtu COVID-19 ne’e dizemina husi órgaun komunikasaun sosiál ba públiku jerál ne’e liuhusi sala situasaun ne’ebé estabelese ho baze ba diploma ministeriál númeru 14/2020, 31 fulan-marsu.

Atu funsiona Sala Operasaun ne’e, Primeiru-Ministru liuhusi despaisu ne’e nomeia portavós sira ne’ebé hala’o funsaun iha sala situasaun mak hanesan:

1.Kapitaun Mar no Guerra, Pedro Klamar Fuik, nu’udar Koordenadór Estadu Maiór

2.Sérgio Lobo, Eis Ministru Saúde, nu’udar Kordenadór ba Forsa Tarefa ba Prevensaun no Mitigasaun ba Pandemia Covid-19.

3.Rui Maria de Araújo, nu’udar Kordenadór Ligasaun Ofisiál ba Forsa Tarefa no mós sai portavós ba sala situasaun ne’ebé estabelese tuir Diploma Ministeriál númeru 14/2020. 31 fulan-marsu.

4.Odete Viegas, Diretora Jerál Prestasaun Saúde no membru da Rezolusaun Governu númeru 12/2020, 31 fulan-marsu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here