Nakroma atraka ona iha realokasaun urjente terminál ró iha Portu Dili. Imajen Tatoli/Florencio Miranda Ximenes.

DILI, 03 abríl 2020 (TATOLI) – Maski tama ona semana ida Estadu Emerjénsia relasiona ho pandemia COVID-19 no Governu fó sai ona medida atu halo prevensaun ba moras perigozu ne’e, maibé nafatin ativa movimentu transporte marítima atu fasilita sidadaun sira nia nesesidade, maski iha limitasaun balun.

Ministru Transporte no Komunikasaun, José Agostinho da Silva, informa transporte marítima iha rai ketan enklave Oé-cusse no Atauro, Governu la suspende maibé sidadaun sira ne’ebé hala’o movimentu ba rai ketan rua ne’e kuandu  fila tenke tama kuarentena obrigatóriu karik hakarak mai Dili, nune’e bele prevene surtu COVID-19.

“Ita-nian populasaun iha Dili hakarak bá Oé-cusse no Atauro, sira bele bá maibé tenke kumpre prosedimentu saúde nian katak sira sei la bá uma maibé obrigatoriamente sira to’o iha ne’ebá tama kuarentena, nune’e mós karik husi ne’ebá maka mai Dili, bainhira to’o iha portu ne’e tenke tama iha kuarentena obrigatóriu tanba moras ida ne’e da’et husi ema ba ema. Entaun ita tenke kontrola ho rigorozu atu oinsá moras ne’e labele hada’et nian sirkulasaun husi ema ida ba ema seluk”, dehan Ministru iha ninia gabinete, iha Caicoli, sesta ne’e.

Tuir Ministru José Agostinho, meiu ida-ne’e atu asegura nafatin transporte marítima nian no oinsá maka iha konetividade entre ema husi Dili bá Oé-cusse no Dili bá Atauro.

Nia adianta, kona-ba transportasaun ba kestaun emerjénsia ba rai ketan ne’e, Governu autoriza nesesidade bázika sira maibé sira para iha tasi laran maka ekipa Alfándega no Portu Dili maka tun hodi bá hasai sasán nesesidade bázika iha ró inklui ekipa ró nian ne’ebé lori sasán sira ne’e, sei la autoriza tama tanba tuir dekretu ba medida prevensaun maka la autoriza.

“Hau hato’o katak ohin, ita deside no agora ita antesipa katak kontrolu másimu maka pontu entrada ilegál sira ka jalan tikus sira. Tanba iha tentativa ne’ebé maka iha, ita-nian Forsa Defeza no Polísia halo hela patrullamentu rigorozu iha fronteira atu antesipa karik iha ita-nian sidadaun balun ne’ebé maka tenta liuhosi pontu entrada ilegál sira, ita husu atu presede ba ekipa saúde ninian, nune’e sira bele tama kuarentena obrigatóriu”, subliña ministru.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here