Prezidente Tribunál Rekursu, Deolindo dos Santos. Imajen /Egas Cristovão

DILI, 03 abríl 2020 (TATOLI) -Tribunál Konta (TC-sigla portugés) liuhosi Juis Konselleiru Deolindo dos Santos, ohin, foti desizaun finál hodi aplika pena multa ba kondenadu nain tolu (3) Lourenço Fontes, Mariano Xavier Malic ho Januário Marçal, hosi kazu responsabilidade finanseira sancionatório no reintegratorio, tanba halakon  estadu nia osan iha Ministériu Agrikultura no Peska (MAP).

Notísia Relevante : Tribunál Konta Halo Alterasaun ba Rekerimentu Kazu Osan Lakon iha MAP

Iha leitura sentensa Juis Konselleiru, Deolindo dos Santos hateten, razaun tribunál aplika pena multa ne’e bazeia ba fundamentasaun faktu-sira liuhosi prosesu julgamentu-sira liu-ba hosi kondenadu no deklarasaun testemuña.

Tribunál mós halo analiza auto hanesan mai hosi auditóriu-sira, Ministériu Públiku, kontestasaun defeza, Ministériu Finansas.

Hafoin halo analiza legál ho dokumentu aktu fó konkluzaun iha aktu-sira ne’e, iha duni violasaun responsabilidade finanseira sancionatório no reintegratorio komete infrasaun ba atividade fó apoiu ba agrikultór-sira iha area rural no inklui despeza operasionál nian no pagamentu ilegaís viajen ba perdiem ne’ebé envolve kondenadu nain tolu.

Tuir lei katak,  kondenadu ne’ebé komete responsabilidade sancionatório tenke hetan pena multa no reintegratorio katak devolve fila-fali osan.

Notísia Relevante : Kazu Osan Lakon iha MAP, Defeza Husu Tribunal Kontas Absolve Akuzadu Na’in Tolu

Tribunál kondena ba responsabilidade finanseiru sancionatório pena multa ba kondenadu Lourenço Fontes $2.100, Mariano Xavier Malic ($ 500) ho Januário Marsal $850.

Ba responsabilidade finanseiru reintegratorio, esplika Deolindo dos Santos, kondenadu nain tolu selu hamutuk ho solidariedade ho totál $38.680.

Iha leitura finál ne’e prezide hosi Juis Konselleiru Deolindo dos Santos, Ministériu Públiku  (MP) reprezenta hosi Prokuradór Pascaçio de Roza Alves no kondenadu na’in tolu hetan asisténsia legal hosi Defensór Públiku nain tolu; Germano Ramos, Marçal Mascarinhas ho Nelson Borges.

Kazu ne’e rejista ho númeru prosesu 0072-16.TRDIL,02/2016/TR-37/15 ne’ebé bolu responsabilidade finanseira sancionatório no reintegratorio.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here