Vise-Ministra Finansa Sara Lobo Brites. Imajen/Antonio Goncalves.

DILI, 03 abríl 2020 (TATOLI)—Ministra Finansa Ein-Ezersísiu Atuál Vise-Ministra Finansa, Sara Lobo Brites hateten, despeza hosi orsamentu millaun $150 depdente ba gravidade Coronavirus (COVID-19) tanba orsamentu refere eskluzivamente ba COVID-19 de’it.

“Millaun $150 ne’e sufisiente ka la sufisiente depende ba gravidade. Se situasaun pozitivu ida de’it hanesan agora no nia komesa rekupera daudaun, Maromak tulun ita la afeta. Dalaruma ita la gasta tán maibé kuandu ita tama iha situasaun ida grave loos hanesan esperiénsia rai seluk nian maka millaun $150 ne’e la to’o,” dehan Sara Lobo Brites ba jornalista sira, hafoin partisipa iha Redasaun Finál ba pedidu levantamentu millaun $250 iha Parlamentu Nasionál, sesta ne’e.

Vise-Ministra Finanasa ne’e hateten, ezekusaun orsamentu millaun $150 ne’e la sujeita ba Lei Orsamentu no Jestaun Finanseira (Lei númeru 13/2009), artigu 31 (rejime duodesimál) tanba Parlamentu Nasionál prevee ona artigu únika ida katak ninia ezekusaun iha fleksibilidade.

“Agora despeza saida tama iha COVID-19, tuir ami-nia proposta ami hato’o komponente tolu. Primeiru mak emerjénsia sanitária kompostu hosi despeza sira ba iha akizisasaun medikamentu, ekipamentu materiál ba iha saúde nian. Ita tenke tau osan ba ita-nia profisionál saúde sira, defeza, seguransa, seguransa sivíl entaun tenke apoia ruma ba sira hodi hala’o sira-nia knaar,” nia dehan.

Nia infroma, aloka mós ba fatin hirak ne’ebé Governu deside ona sai kuarentena tanba timoroan barak sei kontinua tama Timor-Leste no fronteira hotu-hotu tenke halo kuarentena obrigatória no balun hela iha otél sira entaun presiza kustu.

“Ita mós hanoin katak se COVID-19 ne’e mak afeta maka’as ita-nia rain entaun intervensaun Governu nian tenke ser mais abranje liután. Ne’e la’ós ita ko’alia de’it ba tratamentu ka kombate COVID-19 ne’e maibé ita tenke apoia ema sira-ne’ebé vulnerável liu. Se COVID-19 ne’e Maromak tulun la afeta ita-nia rain, tanba osan ne’e ita la gasta ba buat seluk tanba nia eskluzivamente ba de’it hodi kombate COVID-19,” nia hateten.

Iha kinta (02/4/2020) ne’e, Parlamentu Nasionál fó autorizasaun ba Governu hodi halo levantamentu ba Fundu Petrolíferu millaun $250.

Hosi millaun $250 ne’e koloka millaun $100 reforsa kofre estadu hodi finánsia serbisu administrasaun públika, millaun $150 antesipa despeza hasoru COVID-19 inklui rekuperasaun atividade ekonómika.

Notísia Relevante: MF Sei Redús Despeza La Nesesáriu iha Administrasaun Públika

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here