Ministru Transporte no Komunikasaun, José Agostinho da Silva. Imajen Tatoli/Egas Cristovão

DILI, 03 abríl 2020 (TATOLI) – Ministru Transporte no Komunikasaun, José Agostinho da Silva, informa Aviaun Airnorth husi Austrália transporta sei ekipamentu médiku ba COVID-19 hodi fasilita ofisiál saúde sira hala’o knaar kombate pandemia vírus perigozu ne’e.

“Iha karta loron haat liubá, ha’u simu katak Aviaun Airnorth sei transporta fasilidade ekipamentu médiku ba COVID-19 husi Austrália mai Timor-Leste”, dehan ministru ba Agência Tatoli, iha ninia gabinete, iha Caicoli, sesta ne’e.

Ba kestaun ne’e, tuir governante ne’e, reprezentante Embaixada Austrália halo ona enkotru ho parte Autoridade Aviasaun Sivíl Timor-Leste (AACTL, sigla portugés).

“Aviaun Airnorth husi Austrália mai Timor-Leste, trasporta ekipamentu médiku ne’ebé maka ita-nia parte saúde presiza no iha aviaun ne’e lori mós ekipa tékniku saúde nian, ne’ebé atu halo montajen ekipamentu iha ita-nian Hospital Nacional Guido Valadares”, nia akresenta.

Kona-ba ekipamentu saúde, seidauk hatene klaru apoiu saida de’it maka sei hetan.

“Kestaun ne’e bele konfirma ho Ministériu Saúde tanba informasaun ne’ebé ha’u hetan ne’e kona-ba ekipamentu médiku liga ba asuntu COVID-19. No ida-ne’e klaru ita-nia nesesidade atu halo atendimentu ba pandemia COVID-19”, Ministru José Agostinho adianta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here