Mariano Assanami Sabino, ho Movimento Tasi Mós tuun ba rega ai-moruk desinfectan iha Akademia PNTL, Comoro, Dili, sesta (03/04/2020). Imajen/Movimentu Tasi Mós

DILI, 03 abríl 2020 (TATOLI)-Mariano Assanami Sabino, atuál membru Parlamentu Nasional no Prezidente Partidu Demokrátiku (PD), ohin, fó apoiu ekipamentu, hanesan ai-moruk desinfactan, luvas ho ropa protesaun, ba Movimento Tasi Mós (MTM) hodi prevene pandemia Coronavirus ka COVID-19.

Mariano Assanami Sabino ho Movimento Tasi Mós rega ai-moruk desinfectan ba transporte públiku iha estrada públiku. Imajen/Movimento Tasi Mós

Aproveita oportunidade ne’e, Mariano Assanami Sabino, hamutuk ho joven balun tuun ba terrenu halo operasionál rega ai-moruk desinfectan iha aeroportu, iha Akademia Polísia  no iha estrada públiku.

Mariano Assanami Sabino, orgullu jerasaun foun hosi MTM ne’ebé hadomi nia-povu hodi halo asaun operasionál prevene COVID-19.

“Ita hotu serbisu hamutuk, atu fó apoiu nafatin no reza ba Na’i Jesus, nune’e moras ne’e labele akontese iha ita-nia rain,” hateten Mariano Assanami Sabino.

Apoiu hirak ne’e, Mariano Sabino dehan, nu’udar apoiu pesoál, mezmu  la’ós buat barak, maibé hatudu ema hotu-hotu tenke fó apoiu iha situasaun difisil ne’e.

Komandante Sentru Akademia Polísia Nasionál Timor-Leste (PNTL),  Superintendente Xefe, Arqemino Ramos, agradese no kontente bainhira hetan kontaktu hosi MTM hodi bele rega karreta-sira no edifísiu-laran iha Akademia-laran ho ai-moruk desinfectan.

Nia hateten,  PNTL kolabora asegura seguransa ba ekipa Movimentu Tasi Mós hodi rega ai-moruk desinfectan ba karreta-sira ne’ebé halai iha estrada públiku.

Koordenadór MTM, Gali Soares Araújo, hateten sira-nia parte iha membru besik ema na’in 30 ho asaun voluntáriu ne’e inísiu iha loron 10 molok Prezidente Repúblika dekreta estadu emerjénsia.

Nia dehan, konsentrasaun sira-nian hodi rega ai-moruk desinfectan hanesan iha Ospitál Nasionál Guido Valadares (HNVG), Sentru Saúde, estrada públiku no rega ema-nia liman iha fatin públiku.

“Ho asaun ne’e hodi minimiza risku propagasaun COVID-19 ba povu,” Gali Araújo tenik.

Jornalista : Nelson de Sousa

Editór       : Francisco Simões

1 KOMENTÁRIU

  1. Hanesan membro MTM husu ba itabot sira tenki hadia naran koordenador MTM nian.
    Koordenador MTM Nia naran Gali Soares Araujo Laos Gailos

Comments are closed.