Aviaun euroAtlantic Airlines. Imajen/wikiwand

DILI, 03 abríl 2020 (TATOLI) – Prezidente Konsellu Administrasaun Autoridade Navegasaun Aéreu Timor-Leste (ANATL), Romualdo da Silva, informa katak parte kompañia aviaun euroAtlantic Airlines (EAA) hatama ona pedidu iha ba Atoridade Aviasaun Sivíl Timor-Leste (ACCTL, sia portugés), hodi husu autorizasaun ba aviaun ne’e bele tama Timor-Leste.

Intensaun husi pedidu ne’e, atu transporta sidadaun portugés sira, atu fila ba Portugál relasiona pandemia Covid-19.

“Sira haruka ona sira ninia pedidu Flight Approval mai iha AACTL atu husu autorizasaun hodi nune’e bele tula profesor portugés sira fila ba Portugál, no pedidu sira nian parte AACTL simu ona no halo koordenasaun ho Embaixada Portugál inklui Autoridade Aviasaun Portugál. Aviaun ne’e sei tun iha aeroportu aban parese tuku hitu ka ualu oras Timor-Leste, ami seidauk hetan nota manifestu klaru maibé aviaun ne’e sei lori pasajeiru ema na’in-200 resin”, dehan Romualdo ba Agência Tatoli iha Sentru Konvensaun Dili (CCD, sigla portugés), sesta ne’e.

Nia adianta, antes ne’e aviaun ne’e mai ona Timor-Leste, ne’ebé maka lori ona Guarda Nasionál Repúblikanu (GNR).

Kona-ba pista rasik, tuir Prezidente Autoridade ne’e katak pista aeroportu ba aviaun ne’e rasik altera dala-ida ona iha Aeroportu Comoro, maibé kuandu aviaun ne’e hetan buat ruma maka parte autoridade la responsabiliza tanba antes ne’e Autoridade Aviasaun Portugál no Embaixada Portugál antes ne’e fó lisensa ba aviaun ne’e mai Timor-Leste.

“Ita-nia pista aviaun ida ne’e naruk metru 1.850 no luan metru 30, taba ne’e ita bele akumula aviaun air bus ne’e maibé hanesan hau dehan katak AACTL hateten ona ba aviaun ne’e kuandu sira maka sei hetan risku ruma iha sira nia semo no altera ita-nia Autoridade Aviasaun no ANATL sei la simu sala husi sira no la responsabiliza. Tanba AACTL fó hatene ona sira nia aviaun inklui parte embaixada katak AACTL fó sai Flight Approval ba sira”, Romualdo afirma.

Prezidente Konsellu Administrasaun ne’e fundamenta katak ANATL sei la autoriza aviaun EEA la tula ema ruma husi rai-li’ur mai Timor-Leste.

“Aviaun ne’e sei la tula ema sira husi li’ur mai Timor-Leste no la lori sasán ruma husi li’ur mai ita-nia rai, maibé aviaun ne’e aban mai sei para iha ita-nia aeroportu atu simu pasajeiru portugés sira husi ne’e bá fali iha Portugál”, subliña Romualdo.

Jornalista Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here