Komandante Jerál PNTL, Faustino da Costa. Imajen Tatoli/Cipriano Colo

DILI, 02 abril 2020 (TATOLI)–Komandante Jerál PNTL, Komisáriu Faustino da Costa infroma, Xefe Estadu Francisco Guterres “Lú Olo” husuba  Polisia Nasionál (PNTL) labele viola dekretu Governu-nian ba Estadu Emerjénsia, liuliu bainhira implementa iha terrenu. 

Faustino hateten, Xefe Estadu husu ba Komandu atu hadi’a no tau matan ba membru sira tanba iha keixa balun katak membru sira viola dekretu ne’e durante atuasaun iha terrenu.

Komandante Jerál ne’e hateten, naksalak sira akontese tanba iha orientasaun Komandu nian fó-sai antes molok aprovasaun Dekretu Governu kona-ba medidas implementasaun Estadu Emerjénsia.

Tanba ne’e, PNTL sei halibur komandante sira husi munisípiu hotu-hotu no Rejiaun Administrativa Espesiál Oe-Cusse Ambeno (RAEOA), atu halo avaliasaun ba implementasaun Estadu Emerjénsia ne’ebé hahú husi 28 marsu 2020.

“Ko’alia mós kona-ba implementasaun estadu emerjénsia, ami aprezenta katak iha inísiu to’o agora, dalaruma iha preokupasaun barak kona-ba atuasaun Polísia, liuliu atendimentu sira iha terrenu. Loos duni iha diretiva balun ou orientasaun balun hasai antes, dekretu Governu ba implementasaun estadu emerjénsia,” dehan Komandante Jerál PNTL, Komisáriu Faustino da Costa, ba jornalista sira hafoin hala’o enkontru semanál ho Prezidente Repúblika “Lú Olo”, iha Palásiu Prezidensiál Bairru Pité, Dili, kuarta ne’e.

Tanba ne’e, nia dehan, PNTL sei instala Sekretariadu Komandu Operasaun Konjunta iha Komandu PNTL hanesan haktuir iha Dekretu Governu ne’ebé aprova iha 28 marsu 2020 liu ba ne’e.

“Iha situasaun balun mós tenke ajusta fali tuir dekretu ida ne’e. Ezemplu, iha dekretu Governu-nian ba Estadu Emerjénsia, PNTL tenke ajusta, ezemplu iha instalasaun ba sekretariadu ka Komandu operasaun konjunta iha Komandu PNTL no agora daudaun sei kontinua diskute,” nia dehan.

Notísia Relevante: Komunidade iha Fronteira Tenke Apoia Seguransa Kombate Movimentu Ilegál

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here