Polísia Unidade Patrullamentu Fronteira (UPF) halo apreensaun ba mina, sigarru no adubu ne’ebé komunidade balun hatama mai ilegálmente. Imajen/Eugénio Pereira

TUNUBIBI, 02 abríl 2020 (TATOLI)–Polísia Unidade Patrullamentu Fronteira (UPF), Postu Alfa Tunubibi, Postu Administrativu Maliana, Munisípiu Bobonaro, halo apreensaun ba gazolina  bidón haat (4) inklui sigarru joker no adubu (pupuk) kuaze karón haat (4) ne’ebé negosiante sira lori ilegál tama hosi fronteira Memo, Nunura no Tunubibi nian.

Notísia Relevante : UPF Kaer Estudante Timoroan 54 

Komandante UPF, João Belo dos Reis, Komandante UPF Kompañia Alfa Bobonaro, Inspetór Paulo Assis Belo ho membru-sira tun direita halo operasaun iha liña fronteira Nunura no Tunubibi, área Balibo no Batugade ni’an. Imajen/Eugénio Pereira

Sasán hirak-ne’e, UPF prende bainhira negosiante-sira lori tama iha tempu kalan mai  área Timor-Leste nian hosi Indonézia ne’ebé la komprova ho dokumentu legál.

UPF rejista ona evidénsia hirak-ne’e hodi aprezenta ba Polísia Munisípiu Bobonaro, hodi prosesa kazu ne’e no husu atu na’in ba sasán sira selu taxa ba estadu, foin bele ba foti filafali sira-nia sasán.

Liuhusi operasaun kontrolu movimentu ilegál la’o-ain ho distánsia kuaze kilómetru 10 ne’ebé hahú hosi área Ponte Nunura  to’o área baliza fronteira Hakesak, Atambua-Indonézia nian, ohin, Komandante UPF Kompañia Alfa Bobonaro, Inspetór Paulo Assis Belo ho Komandante UPF Postu Nunura, Primeiru Sarjentu Adelino Maumali, introdús  ba Komandante  UPF, João Belo dos Reis, kona-ba sasán ilegál hirak  ne’ebé UPF halo apreensaun hosi timoroan balun ne’ebé hatama ilegalmente mai Timor-Leste.

“Maioria sasán nesesidade bázika, inklui gazolina ne’ebé ita-nia komunidade hatama ilegál iha tempu kalan boot,” relata  Inspetór Paulo Assis Belo.

UPF halo nafatin operasaun rutina iha kalan no loron hodi halo apreensaun ba sasán no aprezenta kazu ne’e ba Komandu Polísia Munisípiu Bobonaro atu  prosesa na’in ba sasán sira hodi selu tiha taxa ba estadu mak bele mai foti sasán  sira-ne’e.

Tuir observasaun  Agéncia Tatoli ne’ebé akompaña operasaun nota katak, negosiante-sira kontinua viola regra hodi  hatama sasán nesesidade bázika ho razaun  atu fa’an para bele hetan osan sustenta uma-laran.

Iha operasaun ne’e, Komandante UPF João Belo dos Reis, orienta nafatin Komandante na’in-rua kontinua halo operasaun loron-loron no kontrola movimentu fronteira hodi hapara atividade timoroan  no Indonéziu ne’ebé tama-sai fronteira terrestre para evita pandemia Coronavirus ka COVID-19.

“Imi tenke fó atensaun ba ita-nia populasaun ne’ebé hela besik liña fronteira atu evita halo vizita ka kontaktu populasaun hosi sorin  (Indonézia-red). Imi tenke kontrola sira, tanba ita tenke deskonfia kualkér sidadaun ne’ebé tama-sai liu dalan ilegál bele lori Coronavirus mai TL,” afirma Komandante João Belo dos Reis.

Komandante João esplika, bainhira povu rai rua kontinua halo movimentu tama-sai ilegál bele afeta saúde públiku povu Timor-Leste nian.

Komandante João husu ba membru UPF atu envolve autoridade lokál hosi postu fronteira hotu-hotu  hodi koopera malu hametin serbisu no kontrolu makaas liña fronteira.

Rona tiha orientasaun ne’e, Inspetór Polísia, Paulo Assis Belo no Primeiru Sarjentu Adelino Maumali, deklara, katak sira prontu ezekuta orden serbisu no sosializa informasaun ba povu.

Primeiru Sarjentu Adelino hatutan, hafoin Prezidente Repúblika, Francisco Guterres Lú Olo deklara estadu emerjénsia iha loron 28 marsu liubá, membru UPF liña fronteira koordena kedas ho povu atu izola-an no halo tuir orden saúde públika ne’ebé Ministériu Saúde no Organizasaun Mundiál Saúde (OMS) fó-sai ona.

Inspetór Paulo Assis Belo mós reforsa tan, UPF sei aplika zero toleránsia ba kualkér timoroan no Indonéziu ne’ebé tama liu dalan ilegál.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here