Sekretáriu Estadu Komunikasaun Sosiál (SEKOMS), Merício Juvinal dos Reis Akara. Imajen Tatoli/Egas Cristovão

DILI, 02 abríl 2020 (TATOLI)–Sekretáriu Estadu Komunikasaun Sosiál, Merício Juvinal dos Reis ‘Akara’, apela ba públiku atu fiar ba informasaun ne’ebé transmite liuhosi reprezentante Gabinete Jestaun Krize, ne’ebé xefia husi Primeiru-Ministru, Taur Matan Ruak, tanba ekipa ne’e envolve ona entidade hotu no liña ministeriál.

“Gabinete Jestaun Krize halo bazeia ba lei no lidera direta husi Primeiru-Ministru, Taur Matan Ruak ho ninia vise maka Brigadeiru Jenerál Aluk. Tanba ne’e, husu ba públiku hotu tenke rona informasaun ida de’it husi Gabinete Jestaun Krize, ne’ebé transmite husi reprezentante gabinete ne’e rasik”, dehan Akara liuhosi konferénsia imprensa iha Sentru Konvensaun Dili (CCD, sigla Portugés), kinta ne’e.

Notísia Relevante:PM Taur Formaliza Ona Sala Jestaun Krize no Estrutura ba Luta Kontra COVID-19

Governante ne’e adianta, gabinete ne’e rasik komandu husi Xefe Governu no envolve Ministériu Saúde no liña ministeriál seluk.

“Laiha tan fonte informasaun ka entidade seluk  ne’ebé divulga liga ho COVID-19 tanba ita iha orientasaun klaru katak informasaun tenke transmite ba públiku, nune’e sira bele akompaña liga ho COVID-19. Tanba ne’e, informasaun kredível maka husi Gabinete Jestaun Krize no ita iha komandu, laiha tan komandu A, B no C, maibé ita iha fonte informasaun ida”, Akara akresenta.

Governante ne’e husu ba jornalista liga ba iha  Covid-19  atu fiar ba iha informasaun sira ne’ebé transmite husi sentru mídia  ne’ebé estabelese  ona no labele fiar fonte seluk.

“Ha’u husu ba ita-boot sira atu asegura informsaun sira neebé maka atu sai ba públiku relasiona COVID-19, ita boot sira bele divulga informasaun husi Gabinete Jestaun Krize ne’e rasik tanba situasaun sira hanesan ne’e labele fiar fonte naran de’it”, nia fó hanoin.

Biban ne’e, Akara husu ba entidade ne’ebé de’it, bainhira fó-sai informasaun dadus ruma liga ho COVID-19 tenke hetan autorizasaun.

“Kuandu entidade balun maka atu mai hato’o informasaun ligadu ho COVID-19, maka tenke hetan autorizasaun husi pesoál responsável sira iha Gabinete Jestaun Krize, se lae labele. Kuandu ema ne’e maka laiha autorizasaun sei prosesa tuir lei”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here