Imajen tatoli/António Goncalves

DILI, 02 abríl 2020 (TATOLI)—Proposta adisionál ho montante millaun $150 la pasa iha Parlamentu Nasionál maibé mantein ho proposta orijinál millaun $250 ne’ebé aprezenta hosi Ministériu Finansa.

VIII Governu Konstitusionál husu millaun $400 inklui proposta adisionál maibé Parlamentu Nasionál auotoriza de’it millaun $250 (proposta orijinál hosi Ministériu Finansa). Hosi millaun $250 ne’e koloka millaun $100 reforsa kofre estadu hodi finánsia serbisu administrasaun públika to’o fulan-outubru, millaun $150 antesipa despeza hasoru COVID-19 inklui rekuperasaun atividade ekonómika.

Prezidente Parlamentu Nasionál, Arão Noé de Jesus da Costa Amaral hateten, pedidu levantamentu estraordinária ne’e aprova tiha ona iha jeneralidade no ohin abertura ho artigu dahuluk hosi proposta lei númeru 13/V/2a (proposta hosi Governu).

Proposta lei iha haat (4), artigu 1 ko’alia kona-ba objetu, artigu 2 ko’alia kona-ba autorizasaun ba realizasaun hodi halo transferénsia extraordinária hosi Fundu Petrolíferu, artigu 3 deskreve integrasaun iha Orsamentu Jerál Estadu 2020 nian no artigu 4 (Entrada Em Vigór). Hosi artigu 4 ne’e artigu 2 aprovadu ona, parte lokraik sei debate 3 no 4

“Montante ne’ebé Governu aprezenta mai millaun $250 tuir proposta lei, depois deputadu balun hatama proposta atu aumenta tán millaun $150 ba sa’e ba millaun $400. Proposta ida adisionál ne’e iha votasaun la pasa (atu aumenta millaun $150), maibé mantein ho proposta orijinál millaun $250,” Arão Noé, informa iha Parlamentu Nasionál, kinta ne’e.

Proposta adisionál ne’e la liu tanba rezultadu a-favór 31 kontra 33 no abstensaun 1 maibé proposta levantamentu ho millaun $250 aprovadu ho votu 65, la iha ida mak kontra no abstensaun.

Pedidu levantamentu estraordinária hosi Fundu Petrolíferu ba Orsamentu Jerál Estadu, abrigu iha númeru 1 artigu 7 Lei númeru 9/2005, 3 agostu, alterada hosi lei númeru 12/2011, 28 setembru, ho valór millaun $ 250 hodi finánsia orsamentu duodesimál ba serbisu adminstrasaun públika tomak to’o fulan-outubru 2020.

Molok votasaun, Vise-Xefe Bankada Parlamentár FRETILIN, Francisco Miranda Branco, konsidera proposta adisionál hosi Governu ho montante millaun $150 ne’e pertinente hodi antesipa COVID-19, apoia vítima dezastre naturál no rekuperasaun ekonómiku ne’e pertinente.

“Verba ida adisionál ida ne’e importante atu rezerva, nune’e gabinte krize presiza bele jere hodi antesipa COVID-19. Atu responde ba situasaun ne’e, ami propoin aprova tán millaun $150,” dehan Francisco Miranda Branco liuhosi plenária Parlamentu Nasionál, kinta ne’e.

Entretantu, Deputadu FRETILIN, Antoninho Bianco hateten, proposta ne’ebé FRETILIN hatoo tanba atu apoia de’it buat ne’ebé Governu aprezenta, tanba millaun $ 250 ne’e só tau ba kaixa tezouru.

“Tanba ne’e mak millaun 250 ne’e la sufisiente, aumenta tan millaun $150,” nia dehan.

Hosi proposta millaun $150 ne’e koloka ba kategoria tolu, millaun $63-resin ba sanitaria hodi kombate COVID-19, millaun $36-resin ba protensaun sosiál apoia vítima dezastre naturál, millaun $50 ba rekuperasaun ekonómika ne’ebé konsekuénsia hosi pandemia COVID-19.

“Ne’e hotu hamutuk milaun $400 ne’e bele halo prosesu tomak,” hateten Deputadu FRETILIN ne’e.

Vise-Xefe Bankada Parlamentár PLP, Francisco Vasconcelos, observa parlamentu halimar polítika mak barak liu.

“PLP apoia proposa hosi bankada FRETILIN nian ne’ebé millaun $250 no aumenta tan proposta adisionál millaun $150 hamutuk millaun $400,” dehan Deputadu PLP ne’e.

Entretantu Xefe Bankada Parlamentár CNRT, Duarte Nunes hateten, parlamentu mak halo desizaun polítika tuir lei.

“Kona-ba proposta ne’e ami iha hanoin seluk. Situasaun ne’e ami mantein proposta millaun $250, sei la aumenta tán. Ne’e mak ami-nia pozisaun,” hateten Xefe Bankada CNRT, Duarte Nunes.

Xefe Bankada Parlamentár Partidu Demokrátiku (PD), António da Conceição hateten, planu no kálkulu tenke mai hosi governu.

“Proposta ida-ne’ebé mai hosi governu ne’e mak realísitiku liu tanba ne’e mak ha’u hanoin ita mantein ho proposta millaun $250 ne’e,” nia dehan.

Deputadu Bankada KHUNTO, António Verdiál de Sousa, haktuir semana kotuk parlamentu aprova millaun $250 iha faze espesialidade la’ós proposta adisionál.

Deputadu PLP, Noé da Silva, apoia proposta hosi bankada FRETILIN tanba ema hotu preokupa situasaun tolu, situasaun polítika, inundasaun no COVID-19.

“Ita-boot hanoin took, semana kotuk ita-boot sira dehan osan atu hira ita-boot sira apoia kombate COVID-19 maibé ohin ita-boot deside pozisaun oin seluk.” dehan nia.

Deputadu Partidu Demokrátiku, Adriano do Nascimento, hateten tau osan boot antesipa COVID-19 ne’e di’ak liután.

“Nune’e karik situasaun ne’e mosu deputadu sira la presiza mai debate tan iha parlamentu, razaun segundu presiza osan boot hodi sosa medikamentu saúde,” Deputadu Adriano fó hanoin.

Hatán ba hirak ne’e, Ministra Finansa Ein-Ezersísiu atuál Vise-Ministra Finansa, Sara Lobo Brires, esplika millaun $250 seidauk inklui ba despeza ba COVID-19.

“Governu iha responsabilidade atu gasta de’it ba COVID-19. Orsamentu millaun $250 nia objetivu atu reforsa ita-nia saldu tezouru, la’ós ba despeza COVID-19 no nesesidade emerjénsia sira seluk,” hateten Sara Lobo liuhosi plenária.

Diskusaun ne’e partisipa mós Ministru Reforma Lejizlativa no Asuntu Parlamentár (MRLAP), Fidelis Magalhães.

Notísia Relevante: AMP Husu Governu Justifika Orsamentu Antesipa COVID-19

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here