Ministru Koordenadór Asuntu Ekonómiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen/Egas Cristovão

DILI, 02 abríl 2020 (TATOLI)–Ministru Estadu Koordenadór Asuntu Ekonómiku interinu, Fidelis Manuel Leite Mangalhães, informa Dekretu Governu ho ninia medida ezekusaun ba Estadu Emerjénsia, fó dalan atu kontinua ba produsaun petrolífera iha Tasi Timór.

Dekretu Governu ho medida ezekusaun ba Estadu Emerjénsia luta kontra COVID-19 ne’e iha artigu 6, alínea 3, fó proibisaun ba sidadaun internasionál ne’ebé tama iha territóriu Timor-Leste, maibé la aplika ba sidadaun estranjeiru ne’ebé hala’o atividade profisionál iha plataforma petrolífera ne’ebé lokaliza iha Tasi Timór.

“Operasaun mina-rai iha Tasi Timór kontinua la’o tanba medida ezekusuan Estadu Emerjénsia ne’e klaramente iha ne’ebá fó esesaun ba iha setór mina-rai, ho ida-ne’e konklui katak atividade iha-ne’ebá (produsaun petróleu) kontinua nafatin iha períodu Estadu Emerjénsia”, tenik Ministru Fidelis iha Parlamentu Nasionál, kinta ne’e.

Eis Deputadu Bankada Partidu Libertasaun Populár (PLP) ne’e dehan, iha medida ne’ebé Governu fó-sai relasiona ho Estadu Emerjénsia ne’e iha esesaun ba operasaun petrolífera.

“Ema estranjeiru sira ne’ebé responsável ba operasaun petrolíferu sira ne’e bele tama, ezemplu hanesan Bayu-Undan ne’ebé ninia atividade tama ona territóriu nasionál Timor-Leste nian”, nia akresenta.

Ho nune’e, Governante ne’e afirma sidadaun estranjeiru ne’e bele tama, maibé tenke iha rekezitu espesiál tanba sira mai bá diretamente bá plataforma iha Tasi Timór. Entaun, Governu nia konsiderasaun ba plataforma Bayu-Undan ne’e hanesan izolamentu ona.

“Tanba sira bá ne’e, la sai husi plataforma mai rai-maran, maibé sira iha tasi-laran de’it ne’ebé laiha problema. Ne’ebé, Dekretu Governu ba  medida ezekusaun Estadu Emerjénsia ne’e mós refleta ona setór mina-rai”, nia adianta.

Atuál Ministru Reforma Lejizlativu no Asuntu Parlamentár refere liután katak kompañia petrolíferu, ConocoPhillips infoma ona atu hamenus ninia trabaladór balun iha fatin operasaun, nune’e atu prevene COVID-19.

“ConocoPhilips hasoru ona ha’u no informa katak iha nia fatin operasaun balun tenke redús sira-nia ema balun, maibe la’ós sai obstáklu ba sira-nia produsaun petrolíferu,” nia dehan tan.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here