Dadur sira iha karreta Prizaun nia laran. Imajen/Dok.Tatoli

DILI, 02 abríl 2020 (TATOLI) – Atu prevene propagasaun Coronavirus ka COVID-19, maka Estabelesimentu Prizaun Becora, hasai mós regulamentu hodi suspende atividade vizita hosi família ba prezu-sira iha prizaun-laran.

Notísia Relevante : MJ Halo Atendimentu Ba Serbisu ho Karater Urjénsia

Diretor Prizaun Becora, João Domingos. Imajen/Antonio Goncalves

Diretór Prizaun Becora, João Domingos, esplika, desizaun ne’e hodi kumpre mós ba despaxu Ministru Justisa, Manuel Cárceres, ne’ebé  proibisaun vizita ba estabelesimentu Prizaun Dili, Gleno ho Suai.

“Ho nune’e, atividade-sira ita sei suspende iha prizaun hodi prevene moras Coronavirus,” esplika  Diretór Prizaun Becora, João Domingos, hodi responde Ajénsia, ohin, via mensajen WhatsApp.

Desizaun seluk tan mak Prizaun Becora suspende atividade formasaun ba maksalak na’in-sira hosi organizasaun la’ós governu nian (ONG), no organizasaun seluk-tan.

Suspende mós atividade vizita sosiál hanesan jogus amizade, grupu korál ba selebra misa hamutuk ho ema maksalak na’in-sira.

Suspende mós atividade selebrasaun liturjia ka espirituál sira hosi ne’ebé durante ne’e hala’o iha Prizaun Becora.

Prizaun Becora, João Domingos, informa, bandu Guarda Prizionál-sira atu simu sasán hosi família maksalak nain-sira atu lori tama ba prizaun laran. (labele simu sasán titipan).

Nia haktuir-tan, prizaun bandu  mós guarda Prizionál-sira atu labele lori sasán saida de’it hosi família maksalak-nain entrada ba iha Estabelesimentu Prizionál nia-laran.

Diretór Prizaun Becora, João Domingos, reforsa tan katak, atividade-sira ne’e suspende hahú  loron 23 marsu  to’o 10 abríl 2020 no posibilidade atu hanaruk ka habadak tempu depende ba orientasaun hosi Estadu Timor-Leste bainhira deklara ona Timor-Leste livre hosi propagasaun COVID-19.

Estabelesimentu Prizionál Becora, daudaun ne’e, iha detein prezu kondenadu na’in 466 no prizaun preventiva  na’in 133 ho totál prezu na’in 599.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here