DILI, 02 abríl 2020 (TATOLI)—Parlamentu Nasionál aprova ona iha Finál Globál ba pedidu levantamentu estraordinária hosi Fundu Petrolíferu ho montante millaun $250 ho rezultadu votasaun a-favór 65, kontra 0 no abstesaun 0.

“Ho nune’e, proposta lei númeru 13/V/2a aprovadu,” Prezidente Parlamentu Nasionál, Arão Noé de Jesus da Costa Amaral, hafoin anúnsia rezultadu votasaun, iha plenária Parlamentu Nasionál, kinta ne’e.

Prezidente Parlamentu Nasioál, fó-sai katak aban Komisaun C (Finansa Públika) finaliza redasaun finál hafoin aprezenta ba Prezidente Repúblika hodi halo promulgasaun.

Nia dehan, tuir lei, Xefe Estadu sei estuda loron 30 maibé ida-ne’e Prezidente Repúblika nia kompeténsia.

VIII Governu Konstitusionál husu millaun $400 inklui proposta adisionál maibé Parlamentu Nasionál autoriza de’it millaun $250 (proposta orijinál hosi Ministériu Finansa).

Hosi millaun $250 ne’e koloka millaun $100 reforsa kofre estadu hodi finánsia serbisu administrasaun públika to’o fulan-outubru, millaun $150 antesipa despeza hasoru COVID-19 inklui rekuperasaun atividade ekonómika.

Prezidente Parlamentu Nasionál, agradese ba deputadu sira tanba maioria vota a-favór ba pedidu levantamentu ne’e.

Xefe Bankada Parlamentár CNRT, Duarte Nunes hateten, orsamentu millaun $250 ne’e sufisiente hodi finánsia mákina estadu, antesipa despeza COVID-19 no rekuperasaun ekonómika.

“Se iha implementasaun mak la to’o, Governu bele husu pedidu mai Parlamentu Nasionál,” nia dehan liuhosi plenária.

Maski nune’e, Xefe Bankada CNRT, Duarte Nunes hateten, Timor-Leste labele moris ho orsamentu duodésimu .

Xefe Bankada PD, António da Conceição hateten, presiza reforsa Governu hodi kombate no halo prevensaun hasoru COVID-19.

Entretantu, Vise-Xefe Bankada Parlamentár FRETILIN, Francisco Miranda Branco, konsidera montante millaun $150 ne’e pertinente hodi antesipa COVID-19, apoia vítima dezastre naturál no rekuperasaun ekonómiku.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here