Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/António Gonçalves

DILI, 02 abríl 2020 (TATOLI)—Ministru Reforma Lejizlativa no Asuntu Parlamentár (MRLAP), Fidelis Leite Magalhães hateten, orsamentu ne’ebé apoia empreza privada inklui mídia no jornalista sira tama iha pakote rekuperasaun ekonómia.

Ministru Fidelis akresenta, Governu sei fó konsentrasaun ba esforsu hotu durante estadu emerjénsia maibé atividade la nesesáriu sira para hotu.

Maski nune’e, Ministru Reforma Lejizlativa no Asuntu Parlamentár ne’e preokupa tanba Parlamentu halo redusaun ba montante orsamentu ne’ebé Governu aprezenta.

“Kona-ba apoia ba empreza privada sira inklui jornalista sira, jornál sira,, ne’e tama iha pakote rekuperasaun ekonómika,” dehan Ministru Reforma Lejizlativa no Asuntu Parlamentár, Fidelis Leite Magalhães, iha ámbitu debate pedidu levantamentu estraordinária, Plenária Parlamentu Nasionál, kinta ne’e.

Ministru Fidelis Leite Magalhães ko’alia asuntu ne’e hafoin Deputada Bankada Parlamentár KHUNTO, Olinda Guterres, nia preokupasaun kona-ba orsamentu antesipa COVID-19 durante vijénsia estadu emerjénsia ne’e jornalista mós hetan ka lae.

“Preokupasaun ne’e ami rona. Ami konkorda no apresia. Ne’e posibilita Governu atu apoia sé-sé de’it iha faze estadu emerjénsia ne’e. Ne’e só ba protesaun sosiál, ida-ne’e ba de’it sira-ne’ebé tama ona iha rejime seguransa sosiál-nian,” nia dehan.

Maski nune’e, nia hateten, Governu hakarak apoia Ajénsia Notisioza sira maibé ida-ne’e labele realiza. Ministru mós la esplika klaru tanbasá mak la realiza enkuantu orsamentu ba rekuperasaun ekonómika inklui despeza COVID-19 ne’e hamutuk millaum $150.

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here