Hahán lokál. Foto/Timor-Leste Offical Tourism Website.

DILI, 02 abríl 2020 (TATOLI)-Kompañia fornesedór ai-han ba abitante sira iha Kuarentena no sentru Saúde sira iha Dili to’o kinta (02/04/2020) balun seidauk estabelese kontratu ho Governu liuhosi Ministériu Saúde.

Kompañia neen maka daudaun ne’e hetan fiar hosi Governu hodi fornese hahán ba abitante kuarentena no médiku sira kuaze ema rihun resin.

Kompañia neen ne’e hanesan Kompañia Sunivio Entertaiment Unipessoál Lda, Dapur Timor Unipessoál Lda, Vermalhosa Unipessoál Lda, Montez Perere Unipessoál Lda, Genivan Unipessoál Lda no Kompaña Fantiza Catering Unipessoal Lda.

Notísia Relevante :Kompaña Neen Forñese Ai-han  ba Kuarentena 17

Diretór Kompañia Fantija Catering Unipessoál. Lda, Carlito de Araújo hateten sira responsabiliza hahán ba abitante 164 iha Kuarentena Madre FMA São João Paulo II, Otél Luz Clarita, Fantiza Otél no Viana.

Hahán ne’ebé kompañia oferese ba abitante-sira iha kuarentena. Imajen Tatoli/Cipriano Colo

”Ami tein ba kurantina haat hamutuk ema na’in 164, hahú husi matabixu dadeer, meudia no kalan. Kada ema ida han dala tolu ho presu $9.50 sentavu,” katak nia ba TATOLI, via telefone kinta (02/04/2020).

Notísia Relevante :Kompañia Vermeloza Fornese Ai-han ba Kuarentena Rua

Nia esplika estabelese ona kontratu ho MS iha loron 27 fulan-marsu hodi fornese de’it ai-han ba abitante iha otél fantiza maibé kontratu foun hodi fornese tan ba Otél Luz Clarita, Viana no Madre FMA Comoro seidauk estabelese maski  servisu ne’e la’o ona iha loron 29 fulan-marsu.

“Ita foin mak tama iha loron 6 halo fornesimentu hahán ba Kuarentina sira ne’ebé ita agora dadaun mós prepara ona dokumentu atu prosesa ba pagamentu,” nia tenik tan.

Iha biban seluk, na’in ba Kompañia Vermelhosa Unipessoál Lda, Fátima Jhon relata fornese ai-han ba ema hamutuk 222 iha kuarentena Tibar, Otél Vila-Verde, D’City, Otél Colmera no servisu ambulánsia.

“Foin mak loron haat ho totál presu ne’ebé mak hatama ona ba aprovizionamentu hamutuk $4.700,” katak nia.

Diretór Kompañia Suniviu Entertament Unipessoál Lda, Domingos Xavio, informa ninia parte toma konta de’it ba pesoál saúde 170 iha Sentru Saúde haat  hanesan Formoza I, Formoza II, Sentru Becora, Sentru Vera, Cruz, no Sentru Comoro.

Entretantu, tuir relatóriu hosi servisu aprovizionamentu Ministériu Saúde katak foin estabelese kontratu ho kompañia tolu hanesan Sunivio Entertaiment Unipesoál Lda, Montes Ferere Unipesoál Lda, Vermelhosa. Enkuantu Dapur Timor Unipessoál Lda, Genivan no Fantiza Unipessoál Lda seidauk.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here