Komandante UPF, Superintendente Xefe, João Belo dos Reis, tula diviza ba membru-sira iha Kuartél UPF, Batugade, Bobonaro, kinta (02/04/2020). Imajen/Eugénio Pereira

DILI, 02 abríl 2020 (TATOLI)–Komandu Unidade Patrullamentu Fronteira (UPF), ohin, hala’o promosaun diviza ba ofisiál no membru UPF na’in-54.

Notísia Relevante : UPF Apoiu Kolxaun 100 Ba Kuarentena Batugade

Komandante UPF, Superintendente Xefe, João Belo dos Reis ho Segundu Komandante UPF Superintendente, João Sancho Pires, foto hamutuk ho membru-sira hafoin serimónia promosaun diviza, kinta (02/04/2020). Imajen/Eugénio Pereira

Ofisiál no membru 54 ne’e kompostu hosi Ofisiál Superiór Superintendente Asistente ba Superintendente na’in ida (1), Inspetór ba Inspetór Xefe na’in-ida, Sarjentu ba Primeiru Sarjentu na’in-haat, Ajente Prinsipál ba Ajente Xefe na’in-lima no Ajente ba Ajente Prinsipál na’in-43.

Promosaun ne’e, hala’o direta hosi Komandante UPF, Superintendente Xefe, João dos Reis Belo, akompaña hosi Segundu Komandante UPF Superintendente, João Sancho Pires no Inspetór Xefe, Angelo Quelo bazeia ba despaixu Komandu Jerál PNTL númeru 139/CG-PNTL /III/2020.

Promosaun ne’ebé hala’o iha Kuartél Jerál Komandu UFP Batugade, Bobonaro, partisipa direta mós hosi membru sira nu’udar onra ida ba UPF ne’ebé hetan fiar hosi Komandu Jerál PNTL no Estadu hodi garante seguransa tuir lema UPF “Ha’u Nia Sakrifisiu Mak Dedikasaun Ba Estadu”.

Superintendente Xefe, João Belo dos Reis, hato’o parabéns ba membru-sira atu kontinua presta serbisu, liuliu garante seguransa másimu tuir desizaun estadu hodi asegura estadu emerjénsia no kontrola metin movimentu ema labele tama sai ilegál iha liña fronteira terrestre.

João dehan, promosaun ne’e nu’udar pasu ida tan ba oin hodi membru-sira ejerse sira-nia funsaun ho di’ak liután no promosaun ne’e hala’o ho serimónia simples, tanba mundu inklui Timor-Leste luta hasoru propagasaun pandemia Coronavirus ka COVID-19.

“Promosaun ne’e nu’udar orgullu ba imi, tanba tinan barak nia-laran maluk-sira la falla hala’o serbisu,”  hateten Komandante João.

Nia afirma tan, promosaun ne’e mós nu’udar responsabilidade boot-ida ba membru-sira bainhira aumenta kargu, signifika responsabilidade boot liután oinsá  hatudu nafatin konfiansa ba ierárkia-sira no implementa serbisu hodi respeita regra hotu tuir lei.

“Promosaun ne’e atu ezije ita sakrifika ita nia-an ho di’ak liután hodi sai espellu ba membru hotu-hotu atu kumpre nafatin regra ho disiplina,” nia apela.

Ba membru sira-ne’e hetan ona promosaun sei muda mós sira-nia servisu ba fatin foun hodi kontinua presta servisu ho profisionál liután hodi hametin liután unidade.

Komandante ne’e rekoñese mezmu tinan barak membru balun halo serbisu hasoru dezafiu ho kondisaun postu ladún di’ak, hasoru dezafiu oin-oin no dook hosi família, maibé membru-sira hatudu nafatin espíritu nasionalizmu hodi serbí estadu.

Daudaun ne’e membru UPF hamutuk na’in-363, kompostu hosi feto  na’in-16  no mane na’in-347 ne’ebé hala’o seguransa másimu iha postu integradu sira ne’ebé estadu harii ona iha liña fronteira terrestre.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here