Prezidente Conselho de Imprensa, Virgilio Guterres. Foto Tatoli

DILI, 02 abril 2020 (TATOLI)–Prezidente Konsellu Imprensa (KI), Virgílio da Silva Guterres, husu ba jornalista sira atu evita teoria konspirasaun tanba ho propagasaun pandemia COVID-19 iha mundu tomak dala barak teoria konspirasaun ne’e mosu.

Nia hatutan, jornalista sira labele tama iha rede ka teoria konspirasaun ida-ne’ebe hateten katak nasaun Xina mak prodús Coronavirus (COVID-19) hodi hatún nasaun Amerika.

“Ita mós labele tama iha rede ida-ne’e. Ema hateten katak Xina mak prodús hodi hatún Amerika, ida-ne’e ema dehan teoria konspirasaun. Loos ka sala, iha ne’ebá, maibé ita-nia foka mak notísia ida oinsá atu hasa’e ita-nia públiku nia entendimentu no kompreensaun kona-ba perigu moras aat ne’e ninian no medida saida mak atu halo,” dehan Prezidente Konsellu Imprensa (KI), Virgílio da Silva Guterres, ba jornalista sira iha konferénsia imprensa iha salaun KI, Quintál Boot, Dili, ohin.

Entretantu, nia hatutan, molok jornalista sira sai bá fatin kobertura tenke proteje sira-nia an uluk maibé tenke kaer metin nafatin kódigu étika jornalista nian ba iha situasaun atuál hanesan ema ne’ebé mak afetadu COVID-19 ba komunidade.

Nia dehan, debate iha mídia sosiál públiku no ema barak mak kestiona katak atu fó-sai ema ne’ebé mak afetadu nia naran maibé tuir kódigu étika la presiza fó-sai identidade ema afetadu ne’e sé-sé.

“Ita la presiza fó-sai ema ne’ebé mak afetadu COVID-19 nia identidade no ema ne’e sé-sé. Buat ne’ebé mak ita atu fó ba ita-nia públiku mak ema ne’e afetadu no agora iha hela izolamentu. Nune’e, públiku hatene katak ema ne’e iha izolamentu ne’e redús ona moras, tanba nia labele da’et ona ba ema seluk. Laiha nesesidade atu dehan ema ne’e mai hosi nasaun ne’ebé ka naran saida,” nia dehan.

Aleinde kobertura ba situasaun hirak-ne’e, nia hateten, di’akliu jornalista ba konsentra iha notísia pedagójika ne’ebé mak ajuda públiku atu hatene perigu moras ne’e saida no mós oinsá esforsu autoridade no Governu nian tau garante katak propagasaun da’et COVID-19 labele da’et tan.

“Ita konsentra ba saida. Ezemplu, polítika Governu nian katak atu harii laboratóriu iha-ne’ebé, identifikasaun fronteira no mós alfándega. Tanba horisehik ita rona katak ita-nia sasán liga ho COVID-19 ka sasán hodi halo laboratóriu maibé trankadu tiha iha alfándenga. Entaun, ita nu’udar jornalista tenke buka tuir. Tuir orden katak labele hasai sasán entaun alfándega mós la hasai sasán entaun ho informasaun hirak-ne’e mak presiza fó hatene ba públiku,” nia dehan.

Notísia Relevante: KI Apresia Governu Harii Sentru Mídia

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here