Prezidente Conselho de Imprensa (CI). Virgílio da Silva Guterres. Imajen TATOLI/Egas Cristovão.

DILI, 02 abríl 2020 (TATOLI)–Prezidente Konsellu imprensa (KI), Virgílio da Silva Guterres hateten, Konsellu Imprensa apresia Governu Timor-Leste tanba rona preokupasaun hosi Konsellu Imprensa liuliu kona-ba protokulu komunikasaun no mós harii sentru mídia ba COVID-19.

“Konsellu Imprensa apresia Governu Timor-Leste tanba rona Konsellu Imprensa nia preokupasaun liuliu kona-ba protokulu komunikasaun no mós sentru mídia ninian. Horisehik KI akompaña iha konferénsia imprensa haree katak sentru mídia ne’ebé ke Govenu fó-sai regularamente ona iha Ekipa Jestaun Krize nia mahon,” dehan Prezidente Konsellu Imprensa, Virgílio da Silva Guterres, ba jornalista sira liuhosi konferénsia imprensa iha salaun KI, Quintál Boot, Dili, kuarta ne’e.

Nia hatutan, ho harii sentru mídia ne’e, ekipa jestaun krize bele halo regularmente fó-sai informasaun ne’ebé loos no kredível ba públiku sira kona-ba COVI-19.

Tanba ne’e, nia dehan, Konsellu Imprensa husu ba jornalista sira liuliu ajénsia TATOLI.IP no RTTL.EP ne’ebé hanesan ajénsia estadu nian, atu stand by iha fatin ne’ebé sai sentru mídia ne’e.

Tuir nia, la’ós halo diskriminsaun ba mídia seluk maibé mídia rua ne’e estadu ninian entaun importante ba sira hodi akompaña informasaun.

“Husu ba jornalista mídia estadu nian liliu TATOLI.IP no RTTL.EP. ne’ebé ajénsia estadu nian husu atu jornalista tenke standby iha fatin ne’ebé sai sentru mídia no tenke akompaña nafatin deklarasaun saida de’it mak dezenvolvimentu ba ekipa jestaun krize halo,” nia sujere.

Tanba, nia esplika, propagasaun Covid-19 globalmente ameasa daudaun ona vida umana no implika mós ekonomia país barak iha mundu.

La’ós ne’e de’it, tuir nia, moras aat ne’e mós infiltra ona mai iha Timor-Leste no ema ida mak konfirmadu ona katak afetadu COVID-19 no daudaun ne’e halo tratamentu iha Klínika Vera Cruz.

Ho ameasa ne’e, nia haktuir, Prezidente Repúblika Timor-Leste, Francisco Guterres ”Lú Olo”, deklara ona estadu emerjénsia iha loron 28 marsu 2020 bazeia ba autorizasaun Parlamentu Nasionál (PN) nian ne’ebé mak liga ho propagasaun pandemia ne’e.

Relasiona ho asuntu ne’e, nia dehan, jornalista ho mídia hola papél importante tebes atu transmite informasaun hodi hakonu populasaun sira-nia direitu atu asesu informasaun ida-ne’ebé loos, kredível no edukativu.

Maski nune’e, nia dehan, jornalista no meiu komunikasaun sosiál sira seidauk hala’o ninia funsaun ho másimu tanba seidauk iha kondisaun própriu atu ajuda no fasilita sira no laiha espasu adekuadu no asesu livre atu halo kobertura.

Kondisaun sira ne’ebé Instituisaun Estadu nian liuliu Sentru Integradu Jestaun Krize no Jestaun Meiu Komunikasaun Sosiál sira iha, tuir nia, seidauk fornese ho di’ak iha períodu propagasaun COVID-19. Hanesan mídia la hetan informasaun loron-loron nian relasiona ho desizaun foun estadu-nian iha períodu propagasaun COVID-19.

“Kuaze jornalista hotu, nia moris iha risku nia-laran. Tanba la kumpre sujestaun Organizasaun Saúde Mundiál (OMS) nian. Hanesan la tuir distánsia sosiál, la uza máskara no seluk tan,” nia hateten.

Hirak-ne’e akontese, tuir nia, tanba instituisaun estadu sira seidauk prepara kondisaun atu fasilita jornalista hodi kumpre distánsia sosiál bainhira halo konferénsia imprensa.

Mídia estadu balun seidauk prepara fatin, sound system no dokumentu sira ne’ebé nesesáriu ba jornalista sira iha espasu konferénsia imprensa.

Nia relata katak populasaun barak mak seidauk hetan informasaun adekuadu kona-ba prevensaun COVID-19 tanba laiha asesu ba kanál informasaun rádiu no televizaun.

Notísia Relevante: KI Husu Governu atu Hamosu Portokolu Medida Prevensaun ba Jornalista Sira

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here