Fatin balun iha Tasitolu nebe governu identifika atu sai fatin kurentena.Imajen/Antonio Goncalves

DILI, 02 abríl 2020 (TATOLI)–Governu liuhosi Ministériu Saúde, daudaun ne’e prevee ona orsamentu ho valór rihun $300 hodi halo preparasaun no manutensaun ba fatin kuarentena iha Tasi-Tolu Dili hodi akumula timoroan sira atu hela durante loron 14 bainhira fila hosi nasaun afetadu COVID-19.

Diretór Nasionál Aprovizionamentu Ministériu Saúde, Bernadino Armando da Silva hateten, orsamentu ne’e sei aloka liuhosi kompañia nasionál balun maka sei ezekuta hodi halo manutensaun ba uma hamutuk 10 ne’ebé antes ne’e Governu konstrui ona hodi realiza serimónia isár bandeira Nasionál 20 Maiu 2019.

“Ita halo ona observasaun ba uma sira ne’e kuaze odamatan, janela, AC, eletrisidade estragu hotu, ita sei hadi’a hotu inklui monta filafali hariis fatin ho sintina móvel iha uma sira-ne’e atubele fasilita ita-nia abitante sira ne’ebé sei hela iha kuarentena ne’e,” informa nia ba TATOLI, via telefone kinta (02/04/2020).

Notísia Relevante :Governu Prepara Tan Kuarentena Foun Iha Tasi-Tolu

Tuir nia, orsamentu ne’e sufisiente atu kompañia ezekuta ba obra ne’e to’o ramata, maibé nia seidauk bele fó-sai naran hosi kompañia implementadór projetu tanba sei iha prosesu aprovizionamentu.

Aleinde uma 10 ne’e, Ministériu Saúde mós planeia sei monta ho kontentór hamutuk 13 hodi kompleta mós ekipamentu iha kontentór laran hanesan kolxaun, eletrisidade, air conditioner ka AC no seluk tan. kontentór hirak-ne’e sei foti hosi Unidade Espesiál Polísia (UEP) Bairro-Pité tanba durante ne’e la uza.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here